Ինչպես հայտնել էինք, Երեւանի ընդհանուր իրավասության դատարանը երեկ քննեց ՊԵԿ նախկին նախագահ, ՀՀ ֆինանսների նախկին նախարար Գագիկ Խաչատրյանի պաշտպանների՝ վերջինիս խափանման միջոց կալանքը փոխելու վերաբերյալ միջնորդությունը: Պաշտպանները մատնանշել էին Խաչատրյանի առողջական վատթարացող վիճակը եւ ՄԻԵԴ-ի կիրառած միջանկյալ միջոցը՝ Խաչատրյանին արտերկրում բուժվելու հնարավորության ապահովումը ՀՀ կառավարությանը պարտադրելու մասին: Մեղադրող-դատախազ Գեւորգ Սարգսյանն էլ առարկել էր միջնորդության դեմ՝ նշելով, որ ՀՀ-ն կատարում է իր պարտավորությունները, եւ Գագիկ Խաչատրյանը թե մինչեւ ՄԻԵԴ-ի որոշումը, եւ թե դրանից հետո ստացել է բուժօգնություն քաղաքացիական հիվանդանոցում: Բացի այդ, դատախազը համոզմունք էր հայտնել, որ ազատության մեջ գտնվելով՝ մեծ է Խաչատրյանի կողմից քննությունից թաքնվելու հանգամանքը եւ գործով անձանց վրա ազդելու հնարավորությունը:
Այսօր դատարանը հրապարակեց որոշումը, ըստ որի՝ պաշտպանների միջնորդությունը մերժվում է, Գագիկ Խաչատրյանի հանդեպ ընտրված խափանման միջոց կալանքը համարվում է հիմնավոր: Որոշումը կարող է բողոքարկվել նշված ժամկետում:
Կարդացեք նաև
Հիշեցնենք, որ ՊԵԿ նախկին նախագահ Գագիկ Խաչատրյանը եւ նրա եղբորորդին՝ ՊԵԿ ներքին անվտանգության վարչության նախկին ղեկավար Կարեն Խաչատրյանը, մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար, մեղադրանքը չեն ընդունում:
Խաչատրյանի պաշտպան Երեմ Սարգսյանն ավելի վաղ Aravot.am-ին տեղեկացրել էր, որ 64-ամյա Գագիկ Խաչատրյանը ողնաշարի ստենոզի անհապաղ վիրահատական բուժման կարիք ունի: Նախորդ տարի նա քննիչի կանչով ընդհատել էր բուժումը Գերմանիայում եւ վերադարձել ՀՀ, իսկ այս տարվա hուլիսին ՄԻԵԴ-ը կիրառեց միջանկյալ միջոց՝ պահանջելով ՀՀ կառավարությունից ապահովել Գագիկ Խաչատրյանի անհապաղ բուժումը քաղաքացիական հիվանդանոցում եւ թույլ տալ մեկնել՝ բուժման նպատակով:
Լուիզա ՍՈՒՔԻԱՍՅԱՆ
