ԱԺ պետաիրավական հարցերի հանձնաժողովի նախագահ Վլադիմիր Վարդանյանն այսօր ԱԺ-ում լրագրողների հետ ճեպազրույցում ասաց, որ ՍԴ թեկնածու Երվանդ Խունդկարյանի հետ «Իմ քայլը» խմբակցության հանդիպմանը Խունդկարյանին հարցեր չի ուղղել, քանի որ բավական երկար ժամանակ ճանաչում է նրան:
Վարդանյանն ասաց, որ ԱԺ լիագումար նիստին հանրությունը կտեսնի, թե ինչ են քննարկում, իսկ թե ինչպես իրենք կքվեարկեն, փակ ու գաղտնի է, ըստ ընթացակարգի: Հարցին՝ միասնական քվեարկությունը բացառո՞ւմ եք՝ նա պատասխանեց, որ գաղտնի քվեարկության պարագայում միասնական քվեարկության մասին խոսելը հակասահմանադրական է. «Սա նույնն է, երբ ընտրությունների ժամանակ ընտրողին հարցնեք՝ ինչպես եք քվեարկել»:
Հետո Վարդանյանն ասաց, որ բավական դրական մթնոլորտում է անցել Խունդկարյանի հետ հանդիպումը ու խմբակցության պատգամավորների հարցերին սպառիչ պատասխաններ են տրվել:
Ինչ վերաբերում է Էդգար Շաթիրյանին, որը Կոռուպցիայի կանխարգելման հանձնաժողովի նախագահ չդառնալով՝ հեռացավ հանձնաժողովից՝ Վարդանյանը պատասխանեց, որ այդ դրվագի հետ կապված նա բացատրություններ է տվել «Իմ քայլին» ու խմբակցության մեծամասնության համար այդ բացատրությունները ընդունելի եւ հասկանալի են եղել:
Կարդացեք նաև
Վլադիմիր Վարդանյանն ասաց, որ պրոֆեսիոնալների թիվը ՀՀ-ում, ցավոք, շատ մեծ չէ, քանի դեռ սոցիալական երաշխիքներ, բարձր աշխատավարձ չեն տալիս, որ մարդուն մղի հանրային ծառայությունների ոլորտ, սա խնդիր է մնալու:
Հռիփսիմե ՋԵԲԵՋՅԱՆ
