ՍԴ դատավոր, ՍԴ նախկին նախագահ Հրայր Թովմասյանը սկզբունքորեն չի մասնակցում ՍԴ աշխատակարգային նիստերին:
Նա լրագրողների հետ զրույցում հայտնեց. «ՍԴ-ի կողմից ինքնուրույն՝ առանց արտաքին որևէ ներգործության ամենավատ թեկնածուի ընտրությունը շատ ավելի լավ է, քան ամենալավ թեկնածուի ընտրությունը արտաքին ներգործությամբ: Այդ դեպքում արձանագրվում է ՍԴ ինքնուրույնությունը, անկախությունը, քան նոր կազմով նման էլեմենտների առկայությունը, որը կարող է բացասական հետևանքներ ունենալ, երբ այդ ճանապարհով ընտրվում է անգամ ամենալավ թեկնածուն»:
Հրայր Թովմասյանն ասաց, որ Երվանդ Խունդկարյանն իր նախընտրելի թեկնածուներից մեկն է եղել, բայց դա զրո նշանակություն ունի, եթե գործընթացը դրսից ուղղորդված է: Հարցին՝ նման ՍԴ-ում կարո՞ղ եք աշխատել, Հրայր Թովմասյանը պատասխանեց. «ՍԴ նախագահի լիազորությունները բավականին սահմանափակ են հետագայում իմ՝ որպես ՍԴ դատավորի աշխատանքի վրա ազդելու-չազդելու տեսանկյունից»:
Լրագրողների հարցին՝ Երվանդ Խունդկարյանի և ներկա իշխանության կապը որտե՞ղ է տեսնում, նա պատասխանեց. «Իմ տպավորությունն այդպիսին է, իմ տպավորությունները ո՞նց ձեզ բացատրեմ. մարդկանց խոսելուց, պահվածքից, վարքագծից, ներսից, դրսից, դրան նախորդող իրավիճակից: Այդ մասին ես ասել եմ նաև նիստի ժամանակ ու դուրս եմ եկել»:
Կարդացեք նաև
Լրագրողների հարցին՝ եթե նման տպավորություն չլիներ, ինքը Խունդկարյանին կո՞ղմ կքվեարկեր, Հրայր Թովմասյանն արձագանքեց՝ ինքն ունեցել է իր թեկնածուն:
Հիշեցնենք՝ նա առաջադրել էր ՍԴ դատավոր, ՍԴ նախագահի ժամանակավոր պաշտոնակատար Աշոտ Խաչատրյանի թեկնածությունը, սակայն նա ինքնաբացարկ էր հայտնել:
Նա հորդորեց ՍԴ-ի մասին չխոսել, թե բևեռվածություն կա ՝ հին, նոր ու վստահեցրեց՝ չի կարող նման բան լինել:
Միայն փոխանցեց, ցանկացած մարմնի աշխատակազմի կեսն էլ որ փոխվի, ընթացակարգային հարցերը այդպես սահուն չեն ընթանա:
Հարցին՝ իսկ ինքն ինչպե՞ս է իրեն զգում, ո՞նց է աշխատելու նոր ՍԴ-ում, Հրայր Թովմասյանը պատասխանեց. «Ինձ լավ եմ զգում, ջերմությունս 36.6 է, կայուն, վաղուց՝ արդեն 18 տարի չեմ հիվանդացել»:
Տաթև ՀԱՐՈՒԹՅՈՒՆՅԱՆ
