Ազատության հրապարակում ելույթ ունեցավ «Հայրենիք» կուսակցության նախագահ Արթուր Վանեցյանը: Նա ասաց. «Այստեղ մենք հավաքվել ենք ոչ թե իշխանափոխության համար, այլ մեկ նպատակով՝ մեր ինքնությունը, մեր Արցախը փրկելու: Հայ ազգը երբեք չի ընկրկելու, հայ ազգը հաղթելու է անպայման:
Ժողովո՛ւրդ ջան, մենք բոլորս չենք գնալու տուն, կանգնելու ենք մինչեւ վերջ, մինչեւ հասնենք մեր երկրի փրկությանը: Ամեն վայրկյանը, ամեն օրը, ժամը կարող է կործանարար լինել հայ ազգի համար: Հայի գենը կարող է կորել: Այն դավադիր ուժերը, այն գործակալական ցանցերը, որոնք այս 2,5 տարվա ընթացքում փորձում էին ոչնչացնել մեր ազգային ինքնությունը, մեր ազգային արժեքները, այսօր կարճ ճանապարհով Արցախում այս անիմաստ հրահրած պատերազմի արդյունքում ու 44 օր բոլորին խաբելով՝ բերեցին կործանեցին, կոտորեցին հազարավոր երիտասարդների: Մենք իրավունք չունենք այդ տղաների, մեր զավակների, մեր հայրերի համար այստեղից մի քայլ հեռանալու: Պայքարելու ենք մինչեւ վերջ եւ այս վերջը շատ մոտ է»:
Հռիփսիմե ՋԵԲԵՋՅԱՆ
