Լարված իրավիճակ է Ազատության հրապարակում, որտեղ ոստիկանությունը բռնի ուժով բերման է ենթարկում հավաքվածներին:
ԲՀԿ առաջնորդ Գագիկ Ծառուկյանն այս պահին ԱԱԾ-ում է, որեւէ հիմնավորում չեն տվել ու ԲՀԿ պատգամավորները չգիտեն, թե ինչ պատճառաբանությամբ են տարել ԱԱԾ:
17 կուսակցությունների ներկայացուցիչները, որոնք ավելի վաղ պահանջել էին Նիկոլ Փաշինյանի հրաժարականը, Ազատության հրապարակում են:
ԲՀԿ խմբակցության քարտուղար Արման Աբովյանին բռնի ուժով հեռացրեցին Ազատության հրապարակից, բայց նա այս պահին նորից հրապարակում է: ՀՅԴ-ական նախկին մարզպետ Աշոտ Սիմոնյանին բռնի ուժով, ձեռք ու ոտքից բռնած բերման ենթարկեցին: ԲՀԿ-ական Հրանտ Մադաթյանին փորձեցին բռնի ուժով հեռացնել: Իվետա Տոնոյանը հունից դուրս եկավ՝ «Հրա՛նտն է Մադաթյան, առաջնագծից է գալիս, 40 օր առաջնագծում է եղել»:
Կարդացեք նաև
Մինչ այդ բերման էին ենթարկել ՀՀԿ-ական Էդուարդ Շարմազանովին, Հայկ Մամիջանյանին, Միհրան Հակոբյանին եւ այլոց:
Նաիրա Զոհրաբյանն ասաց. «Թող ինձ, իմ գործընկերներին զրկեն պատգամավորական մանդատից ու ձերբակալեն, մենք էլ ինչի՞ ենք ապրում, երբ Արցախը հանձնվել է: Ձեր երեխաներն անիծվելու են, սպանեցիք էդքան երեխու գլուխ, թուրքին հայրենիք վաճառողնե՛ր»:
Հաշված րոպեների ընթացքում, երբ ոստիկանությունը սկսեց ձերբակալությունների շարք՝ Ազատության հրապարակը դարձավ բազմամարդ ու կարմիր բերետավորները հետ քաշվեցին մի փոքր՝ հարթակը զիջելով ցուցարարներին:
ՀՅԴ-ական Արծվիկ Մինասյանը բանակցում է ոստիկանության հետ՝ բացատրելով, որ երբ այսպիսի իրավիճակ է, «Հավաքների ազատության» օրենքով պետք է շարժվեն, անկախ ռազմական դրությունից:
Հռիփսիմե ՋԵԲԵՋՅԱՆ
Լուսանկարը՝ Հրանտ Մելիք-Շահնազարյանի