«Հայաստան» դաշինքի ընտրական ցուցակում ընդգրկված է գիտությունների 2 դոկտոր-պրոֆեսոր, գիտությունների 11 թեկնածու, որոնցից 10-ը՝ դոցենտ, 2 գեներալ, որոնցից 1-ը՝ գեներալ-գնդապետ, մեկ գնդապետ, դպրոցի 3 տնօրեն, համայնքների 7 ղեկավար, ԱԺ 7 նախկին պատգամավոր, 5 նախկին նախարար եւ մեկ փոխվարչապետ։
Դաշինքի նախընտրական ցուցակի որակական ցուցանիշն այսօր կայացած մամուլի ասուլիսում, լրագրողներին փոխանցեց երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը:
Վիկտոր Սողոմոնյանը խոսեց նաեւ Ռոբերտ Քոչարյանի մարզային հանդիպումների մասին. «Հանդիպումներն անցնում են ջերմ մթնոլորտում, նախագահը գոհ է այցերից, կարծում եմ, որ այդպես էլ շարունակվելու է: Վստահությունը բարձր է, ինչպես եւ սկզբում, եթե չասեմ, որ ավելի է մեծացել»: Բանախոսը տեղեկացրեց, որ այս օրերի ընթացքում դաշինքի կենտրոնական շտաբ են այցելել տարբեր մասնագիտական կառույցների ներկայացուցիչներ եւ իրենց աջակցությունը հայտնել, նաեւ, աջակցության գործնական դրսեւորումներ են եղել`հանրության տարբեր շերտերի կողմից:
Կարդացեք նաև
«Հայաստան» դաշինքի անդամ Անդրանիկ Թեւանյանի գնահատականներով էլ հետազոտությունները ցույց են տալիս, որ ընտրություններին մասնակցող երկու հիմնական ֆավորիտ սուբյեկտներ կան. իշխանությունը, որը ավանդաբար ընտրական գործընթացներում համարվում է գլխավոր սուբյեկտներից մեկը եւ «Հայաստան» դաշինքը:
Երբ հիմնական դերակատար ուժերը հայտարարել են, որ որեւէ ձեւով չեն համագործակցելու Նիկոլ Փաշինյանի գլխավորած ուժի հետ, այս պարագայում, ակնհայտ է, որ Նիկոլ Փաշինյանի միակ դաշնակիցը մնում է ընտրակեղծիքը կամ ծայրահեղ ֆորսմաժորը. «Ֆորսմաժորի առումով ինքը կարող է ակնկալել մեր երկրի թշնամիների աջակցությունը եւ դրանով փորձել հետաձգել ընտրությունները, որը նվազ հավանական եմ համարում, որովհետեւ այդ դեպքում իրավիճակին ավելի կվատանա»: Բանախոսի գնահատմամբ, հունիսի 20-ին կատարվելու է ճակատագրական ընտրություն, դրված է լինելու շեքսպրիյան հարց՝ լինե՞լ, թե՞ չլինել։
Իրավիճակը առավել չբարդացնելու համար, նա ընտրողներին կոչ է անում`քվեն տալ «Հայաստան» դաշինքին, որպեսզի այն ծառայի հիմնական նպատակին`իշխանությունից հեռացնել Նիկոլ Փաշինյանին իր համախոհներով:
Նելլի ԳՐԻԳՈՐՅԱՆ
