Երեւանի Շենգավիթ վարչական շրջանի ընդհանուր իրավասության դատարանում դատավոր Ռ. Պապոյանի նախագահությամբ կայացավ «Երկիր Ծիրանի» կուսակցության նախագահ Զարուհի Փոստանջյանի վերաբերյալ առաջին դատական նիստը:
Տիկին Փոստանջյանին մեղադրանք է առաջադրվել այն բանի համար, որ նա 2021 թ. մարտի 15-ին Աջափնյակ վարչական շրջանում տեղադրված Սողոմոն Թեհլիրյանի արձանի մոտ հասարակության բազմաթիվ անդամների ներկայությամբ ունեցած ելույթի ընթացքում հետպատերազմյան իրադրությամբ պայմանավորված, հասարակության մոտ առկա տրամադրությունները եւ սոցիալ-հոգեբանական խոցելի իրավիճակն օգտագործելով, ՀՀ վարչապետ Նիկոլ Փաշինյանի եւ անձանց խմբի նկատմամբ քաղաքական ու այլ հայացքներով պայմանավորված դիտավորությամբ հնչեցրել է բռնությունը՝ սպանությունը հրապարակայնորեն արդարացնող կոչեր:
Դատական նիստն սկսվելուց առաջ Զարուհի Փոստանջյանը Aravot.am-ին ասաց, որ ինքը չի ընդունում ներկայացված մեղադրանքը: «Ինքս էլ չեմ հասկանում այս մեղադրական եզրակացությունը, որ ինձ փոխանցվել է: Պետք է հստակեցում մտցվի մեղադրանքի այս ծավալի վերաբերյալ»,-ասաց նա:
Նիստի ընթացքում Զարուհի Փոստանջյանի շահերի պաշտպան Հայկ Ալումյանը ներկայացրեց մեղադրանքի այն հատվածները, որոնց ձեւակերպումներն իրենց հասկանալի չեն, հետեւաբար, պաշտպանվելը ոչ միայն դժվար է, այլ, պարզապես, հնարավոր չէ: «Մենք խնդրեցինք, որպեսզի դատարանը դրանք պարզաբանի: Դատարանը փորձ արեց, որպեսզի այդ ամենը պարզաբանի մեղադրանքի կողմը, որը պարզապես խուսափեց դա անելուց: Այսինքն, մեզ դրեց այնպիսի կացության մեջ, որ մենք հիմա մեղադրանքից պաշտպանվելու հնարավորությունից էապես զրկված ենք: Մեղադրանքի մեջ նշված է, որ նաեւ Նիկոլ Փաշինյանի նկատմամբ բռնության կոչ է եղել: Եթե դա այդպես է, մենք տեսնում ենք, որ դատախազության գործողությունները հետեւողական չեն, որովհետեւ եթե իրենք գտնում են, որ Նիկոլ Փաշինյանի նկատմամբ եղել է բռնության կոչ, Նիկոլ Փաշինյանը այս գործով պետք է ճանաչված լիներ տուժող: Մենք ասում ենք՝ եղեք հետեւողական: Եթե մեղադրանքի ձեւակերպումից դա է հետեւում, դատարանը պետք է տուժողին բերի, որպեսզի նրա մասնակցությամբ այս մեղադրանքը քննարկի: Գուցե, տուժողը գա եւ ասի, որ դա իր նկատմամբ բռնության կոչ չի համարում»,-ասաց Հայկ Ալումյանը:
Կարդացեք նաև
Դատական նիստը հետաձգվեց: Հաջորդ նիստը կկայանա օգոստոսի 20-ին:
Աշոտ ՀԱԿՈԲՅԱՆ
