Այսօր առավոտից կառավարության դիմաց ցույց անող մի խումբ ՀՅԴ-ական երիտասարդների ոստիկանությունը բռնի ուժով քիչ առաջ բերման ենթարկեց: Այս պահին ցույցի մասնակից մի խումբ երիտասարդներ ոստիկանության բաժանմունքներում են:
Նրանք նախքան բերման ենթարկվելը՝ ներկայացրին 10 փաստ՝ ինչու է Նիկոլ Փաշինյանը պետական դավաճան։ Նրանք իրենց հետ բերել էին անդրավարտիք, կոնֆետ ու ելակ։ Երիտասարդ ՀՅԴ-ականների խոսքով, սրանք, Նիկոլ Փաշինյանի միակ բարեփոխումներն են, որոնք նա արել է բանակում։
«Մեզ բացարձակ չի հետաքրքրում՝ դա դիտավորյա՞լ դավաճանություն էր, թե՞ ուղղակի այդ քայլերը բերեցին դավաճանական ելքի, որովհետեւ նա ստանձնել է Հայաստանի հանրապետության վարչապետի պաշտոնը եւ պարտավոր է այնպես անել, որ այդ բոլոր քայլերը բխեն մեր երկրի ու ժողովրդի ազգային շահերից, սակայն ճիշտ հակառակն է եղել: Հիմա էլ գիտակցված՝ Նիկոլ Փաշինյանը երկիրը տանում է այդ ուղղությամբ»:
Կարդացեք նաև
ՀՅԴ երիտասարդների խոսքով, երբ վերլուծում են Նիկոլ Փաշինյանի եւ նրա թիմի անդամների գործողություները՝ ստացվում է, որ այդ մարդիկ «ե՛ւ ապիկար են եւ դավաճան» են. «Նախքան պատերազմը նա ոչնչացրել է հարաբերությունները Հայաստանի բոլոր դաշնակիցների հետ, բանակցություններում իրեն դրսեւորել է, որպես անվստահելի գործընկեր, ինչի հետեւանքով պատերազմական գործողությունների ընթացքում Հայաստանը մնացել է միայնակ եւ զրկվել միջազգային լծակներով Ադրբեջանի վրա ազդելու հնարավորությունից»:
Նրանք հիշեցրին ՀԱՊԿ-ի պատմությունը՝ Յուրի Խաչատուրովի հետ կապված, Իրանի հետ հարաբերություները փչացնելը եւ այլն:
Նրանց խոսքով, բանակի համար զենք գնելու փոխարեն՝ կոսմետիկ փոփոխություններ է արել՝ «Փոխանակ զրահաբաճկոններ եւ սաղավարտներ գնեին, բանակին մատակարարվել է ելակ, այն դեպքում, երբ բանակում սննդի խնդիր վաղուց չկա: Փոխանակ գնեին հակաօդային պաշտպանության զենքեր, որոնց գնումն արդեն նախատեսված էր, ներկա իշխանությունները գնել են ՍՈՒ-30 օդանավեր՝ առանց հրթիռների, որոնք հնարավոր չի եղել օգտագործել ողջ պատերազմի ընթացքում, դրանք միայն սելֆիների համար են օգտագործվել»:
Ասացին նաեւ, որ պատերազմի առաջին օրերից հայտարարել են արտակարգ դրություն՝ ընդդիմադիրներին լռեցնելու համար: Փաշինյանն, ըստ նրանց, չի կազմակերպել զորահավաք եւ զորքերի համալրումը. «Փոխանակ պատշաճ կազմակերպման եւ կանոնավոր բանակի պահպանմանը, երկրի ղեկավարը կոչ է արել ջոկատներ կազմել՝ անկազմակերպ, առանց անվտանգության մասին հոգալու»: Ըստ նրանց այդ անկազմակերպ գործողություները հետևանքները հազարավոր զոհերն ու հաշմանդամներն էին:
Լուսինե ԲՈՒԴԱՂՅԱՆ
