«Խնայում ենք մարդկանց նյարդերն ու ժամանակը։ Մարդիկ պարապ չեն, որ անընդհատ գան հանրահավաքների։ Մենք գիտենք, որ մեր ընտրողները զբաղված են, ծանրաբեռնված աշխատանքային առօրյայով։ Չենք ընտրում այնպիսի ձեւաչափ, որը կանհանգստացներ մարդկանց»,-Երեւանում այսօր նախընտրական քարոզարշավի ժամանակ լրագրողների հետ ճեպազրույցում ասաց «Լուսավոր Հայաստան» կուսակցության պատգամավորի թեկնածու Անի Սամսոնյանը՝ անդրադառնալով հարցին, թե ինչու են հանրահավաքների փոխարեն բակերով շրջում։
«Այս ձեւաչափով ավելի շատ մարդկանց ենք տեսնում։ Հավաքներն ավելի փոքր ծավալ են ներառում, քան բակից բակ անցնելով քարոզելը»,-նշեց Անի Սամսոնյանը։
Կուսակցության պատգամավորի թեկնածու Գեւորգ Գորգիսյանն էլ հիշեցրեց, որ իրենք 2012թ․-ից օգտագործում են այս քարոզչական ոճը, եւ այն հաջողված է․ «Մարդիկ դրական են տրամադրված։ Մարդիկ գնահատում են, որ մենք ուզում ենք համերաշխության օրակարգ բերենք երկրին»։
Անի Սամսոնյանն էլ հավելեց՝ ԼՀԿ-ն այն ուժն է, որը պարզ երեսով կարող է մտնել բակեր ու չմտահոգվել, որ ինչ-որ խնդիր կարող է ծագել․ «Իսկ այն ուժերը, որոնք ընտրել են հավաքի ձեւաչափը, նրանք հավաքում են իրենց կողմնակիցներին եւ ներկայացնում իրենց ծրագրերը։ Մենք ողջ երկիրն ենք ընտրել որպես հարմարավետության գոտի։ Չենք արել մի բան, որի պատճառով կվախենայինք մարդկանց հետ դեմ առ դեմ հանդիպելուց։ Չենք վախենում, թե քաղաքացին ինչ հարց կտա կամ պատուհանից ինչ կբղավի, նման խնդիրներ մենք չունենք»։
Կարդացեք նաև
Լուիզա ՍՈՒՔԻԱՍՅԱՆ
