Այսօր Փաշինյանը նախընտրական քարոզարշավ է իրականացնում Տավուշի մարզում: Կիրանց համայնքում Աննա Հակոբյանին ծաղկեփունջ նվիրեցին ու շնորհակալություն հայտնեցին. «Ապրեք դուք, որ ամեն ինչ արեցիք ու մեր երեխեքին մենակ չթողեցիք»:
Սահմանամերձ Ոսկեպար գյուղում Փաշինյանը հավաքվածներին հարցրեց. «Հլը ասեք՝ այս ընթացքում ի՞նչ եք լսել, որ ձեզ մտահոգել է: Գիտեք չէ՞, այն, ինչ ասում են, որ մի քիչ աչքներիդ կասկածելի է թվում, դա այդպես չի»:
Մարդիկ վստահեցնում էին, որ Ոսկեպարը Փաշինյանի հետ է: Փաշինյանն էլ ճշտեց՝ ձեր կարծիքով ընտրություններում քանի՞ ձայն ենք մենք հավաքելու Ոսկեպարում: Արձագանքեցին, թե՝ մեր ձեռն է: Նրանք հորդորում էին. «Էն խշտեի աչքը հանի, իրենց հասնում է»: Փաշինյանն էլ պատասխանեց. «Ոչ մեկի աչքը չենք հանելու, բայց օրենքի եւ իրավունքի դիկտատուրա է լինելու:
Մի ոսկեպարցի միայն ճշտեց՝ հողեր են գրավում, բա այդ հողերի հարցը ո՞նց է լինելու, ես ինչի՞ եմ հարցնում, այնտե՛ղ եմ ապրում: Փաշինյանը պատասխանեց. «Ես երեւի մի օր գամ խոսամ, փակ, առանց կամերաների գամ, տեսնեմ դուք ի՞նչ եք մտածում»:
Կարդացեք նաև
Մի ոսկեպարցի ասաց, որ 7-րդ դարի եկեղեցու մոտ մեր դիրքերի առաջ թուրքի տան բակում հին հայկական գերեզմաններն են. «Մեր պապերը ծախել են, հիմա ճակատագրական քայլ է: Սովետի ժամանակ մերոնք ծախել են, եկեղեցին է պահել մեր հողը»: Փաշինյանը պատասխանեց, որ սահմանային ճշգրտումներ են եղել, մի տեղ վերցրել են, մի տեղ տվել. «Հիմա ոնց ձեր սրտով է, հենց այդպես է լինելու: Այդ թեմաները առանձին կնստենք ամեն քարով, ամեն թփով… սահմանազատում պետք է արվի»:
Հռիփսիմե ՋԵԲԵՋՅԱՆ
