«Վերելք» կուսակցության նախընտրական ցուցակի երկրորդ համար Արտակ Հարությունյանը «Հայացք» ակումբում նշեց, թե իմանալով, որ իրենք նախկին զինվորականներ են, հիմնականում հարցեր են ուղղում կապված բանակի եւ անվտանգության հետ, մինչդեռ իրենք կարեւորում են անվտանգությունը բոլոր ոլորտներում: Հավելեց, որ շեշտադրում են անվտանգության ոլորտում դաստիարակության եւ մշակույթի դերը նույնպես:
«Վերելք» կուսակցության մեկ այլ ներկայացուցիչ` հոգեբանական գիտությունների թեկնածու Արամ Գյուրջյանը նույնպես շեշտեց, որ հաճախ հարցեր են առաջանում կապված ռազմաքաղաքական եզրույթի հետ եւ թյուրըմբռնում է տեղի ունենում, թե իրենք, ի վերջո, ինչ են ցանկանում ասել: Նա այս համատեքստում հիշեց նախորդ ընտրություններից առաջ բանավեճի ժամանակ երկու ուժերի առաջնորդների երկխոսությունը, երբ Էդմոն Մարուքյանն ասել էր, թե ինքը կլասիկ քաղաքական գործիչ է, Գագիկ Ծառուկյանը պատասխանել էր. «Ես քո կլասիկ ցավը տանեմ»:
«Ուզում եմ ասել, որ մենք կլասիկ չենք… Ժամանակի պարտադրանք է, որ ձեւավորվել է այս տեսակի եւ այս մոտեցումներով քաղաքական ուժ, որովհետեւ այսօր իրողությունն այնպիսին է, որ բոլոր հարցերի լուծումը նախ եւ առաջ դիտարկում ենք անվտանգության ապահովման համատեքստում… Բայց այսօր անվտանգությունը միայն զինված ուժերի ոլորտը եւ դաշտը չէ: Լիարժեք անվտանգություն ապահովելու համար մեզ անհրաժեշտ են հստակ քաղաքական որոշումներ բոլոր ոլորտներում»,-ասաց Գյուրջյանը:
Գոհար ՀԱԿՈԲՅԱՆ
