Ինչպես տեղեկացրել ենք, այսօր Սահմանադրական դատարանում վիճարկվում են 2021-ի հունիսի 20-ի արտահերթ ընտրությունների արդյունքները՝ «Հայաստան» դաշինքի, «Զարթոնք», «Հայոց հայրենիք» կուսակցությունների, «Պատիվ ունեմ» դաշինքի դիմումների հիման վրա:
Զեկուցող, ՍԴ դատավոր Էդգար Շաթիրյանը ներկայացրեց դիմումատուների հիմնական շեշտադրումները, թե ինչ խախտումներ են մատնանշել դիմումներում:
Մասնավորապես, «Հայաստան» դաշինքը շեշտադրում է արել մեծածավալ վարչական ռեսուրսի, ատելության խոսքի օգտագործման մասին, նշել քրեական հետապնդումները, 23790 քաղաքացիների ոչ կենսաչափական անձնագրով քվեարկելը, զորամասում հաշվառված 10 հազարից ավելի անձանց քվեարկությունները:
«Զարթոնք» ազգային քրիստոնեական կուսակցությունը շեշտադրել է ազատության եւ հավասարության խախտումը, ընտրողների կամքի վրա ազդեցություն գործադրելը, քվեարկության գաղտնիության խախտումը, ընտրողներին ուղղորդելը, պետական գործառույթների ու կուսակցական շահերի միախառնումը, Փաշինյանի բռնությունների կոչերն ու հոգեբանական գրոհը:
Կարդացեք նաև
«Հայոց հայրենիք» կուսակցության կողմից նշվել է, որ ընտրության գաղտնիությունն է խախտվել, հաշմանդամություն ունեցող ընտրական իրավունքն է խախտվել, չի պահպանվել օրենքով սահմանված քվեաթերթիկների ձեւը, վարչական ռեսուրսի տոտալ օգտագործում է եղել, քվեաթերթիկները չեն դրվել չհրկիզվող պահարանում, թափանցիկ ծրարներ են եղել, տպվող կտրոնների վրա լուսանկարների բացակայություն ու համատարած բաժանվող ընտրակաշառք է եղել:
«Պատիվ ունեմ» դաշինքի դիմումում հիմնական շեշտադրումներն են՝ ընտրության հավասար պայմանների խախտումները, նախընտրական քարոզչության ընթացքում թեկնածուների եւ կուսակցությունների համար լուսաբանման պայմանների խտրականությունը, իշխող քաղաքական ուժը ստացել է նշանակալի առավելություններ: Դիմողն անդրադարձել է նաեւ ճնշումներին ու ձերբակալություններին:
ՍԴ դատավոր Արեւիկ Պետրոսյանը նշեց, որ սա աննախադեպ իրավիճակ է, որովհետեւ մինչ այդ երբեւէ նման քանակի դիմումներ ընտրությունների արդյունքների վերաբերյալ չեն քննել: Նա ասաց, որ ստացված փաստաթղթերի տեղեկատվության ծավալն ահռելի է, ուստի հարցրեց, թե ինչո՞ւ մի քանի զեկուցող չի նշանակվել: Շաթիրյանը պատասխանեց, որ դատարանն է այդպես գտել, բայց իսկապես նյութերի ծավալն ահռելի է, անգամ այսօր առավոտյան մի քանի հարյուր էջ նոր նյութեր են մուտքագրվել:
Հռիփսիմե ՋԵԲԵՋՅԱՆ
