«Գաղտնիք չէ, որ մինչեւ պատերազմը, դրա ժամանակ եւ դրանից հետո էլ Ալիեւը ձգտել է վերմակը քաշել իր վրա։ Զարմանալի կլիներ, եթե հակառակն աներ։ Հիմա էլ խաղաղության պայմանագրից է խոսում։ Դա ոչ թե կարելի է կամ ոչ, այլ դա ուղղակի հնարավոր չէ»,-«Առավոտ»-ի հետ զրույցում ասաց քաղաքագետ Ռուբեն Մեհրաբյանը՝ անդրադառնալով Ադրբեջանի նախագահի՝ օրերս արած հայտարարությանը, թե «Ղարաբաղի հարցը լուծված է, եւ Ադրբեջանը Երեւանից դրական պատասխան է ակնկալում խաղաղության պայմանագրի կնքման հարցում»։
Ռուբեն Մեհրաբյանի գնահատմամբ՝ դա հնարավոր չէ շատ պարզ պատճառով. «Արցախյան հակամարտությունը մնում է չլուծված։ Առանց դրա լուծման՝ խաղաղության պայմանագրի այսպես կոչված նյութը բացակայում է։ Ինչպես մինչեւ հիմա է եղել, այդպես էլ շարունակվելու է, քանի դեռ արցախյան հակամարտությունը լուծված չէ, իսկ այն, այո, լուծված չէ։ Բացի Ալիեւից եւ մի քիչ էլ Էրդողանից, ՀՀ-ն ու ԵԱՀԿ ՄԽ համանախագահ երկրները, միջազգային հանրության բազմաթիվ սուբյեկտներ նույնն են ասում, որ արցախյան հակամարտությունը լուծված չէ, որ այն պետք է լուծվի միայն մեկ ճանապարհով՝ եռանախագահության ձեւաչափով։ Ալիեւի նման հայտարարությունը կոչված է եռանախագահության ձեւաչափը շրջանցելու, եւ հիմա մեր խնդիրն է դա թույլ չտալ»։
Հիշեցրինք, որ այսպես կոչված խաղաղության պայմանագրի համատեքստում ընդդիմադիրներն ահազանգում են, թե Նիկոլ Փաշինյանն այն կստորագրի հայկական կողմի համար ոչ ձեռնտու պայմաններում, այսպես կոչված անկլավներն էլ կտա Ադրբեջանին։ Ի պատասխան Ռուբեն Մեհրաբյանը կարծիք հայտնեց, որ այդպես մտածողները գլուխը պատով են տալիս, պատն էլ՝ գլխով. «Նման բանը հիմնավոր չի։ Իրականությունն այն է, որ Արցախի հարցը լուծված չէ եւ պետք է լուծվի եռանախագահության ձեւաչափում, ու այդ հարցում հայկական կողմը եւ համանախագահությունը խոսում են նույն հարթության վրա։ Մնացած խոսակցությունները «բիսեդկայի» խոսակցություններ են»։
Լուիզա ՍՈՒՔԻԱՍՅԱՆ
Կարդացեք նաև
«Առավոտ» օրաթերթ
10.07.2021
