2021թ. հուլիսի 17-ին «Aravot.am» լրատվական կայքէջում հրապարակվել է «Ձևականորեն հարուցված քրեական գո՞րծ. դատախազի աչքի առջև Գյումրու կանաչ գոտում վեր է հառնում ապօրինի պահեստ» վերտառությամբ հոդվածը, որով ներդրողի կողմից շինաշխատանքներ կատարելու հարցում հապճեպություն ցուցաբերելը հոդվածի հեղինակը կապել է «Երիտասարդական» զբոսայգու տարածքի օտարման փաստի առթիվ ուսումնասիրություններ կատարելու և քրեական գործ հարուցելու հետ:
Ավելին՝ հոդվածագիրը, շեշտելով, որ շինարարական աշխատանքները շարունակվում են, հարց է ուղղել, թե այդ դեպքում ո՞րն է քրեական գործ հարուցելու իմաստը և ինչո՞ւ Շիրակի մարզի դատախազը հետևողականություն չի ցուցաբերում շինաշխատանքները դադարեցնելու հարցում, նշելով, թե նախաքննություն է ընթանում ու «նա ուղղակիորեն պարտավոր է շինարարությունը կասեցնելու»:
Պարզաբանման կարգով տեղեկացնենք, որ քրեական գործի հարուցումը, այն էլ պաշտոնեական հանցագործունեության հատկանիշներով, չի կարող ինքնին մասնավոր ընկերության կողմից շինարարական աշխատանքների դադարեցման հիմք հանդիսանալ:
Հուլիսի 8-ին քրեական գործը հարուցվելուց հետո կատարվել են բազմաթիվ քննչական և այլ դատավարական գործողություններ: Գործով էական նշանակություն ունեցող մի շարք հարցեր պարզելու, այդ թվում նաև շինթույլտվության և շինարարության իրականացման օրինականության պարզման նպատակով, վարույթն իրականացնող մարմինը որոշումներ է կայացրել մասնագիտական ստուգում նշանակելու, Գյումրու համայնքապետարանից հիշյալ տարածքի օտարման, շինթույլտվություն տալու հիմք հանդիսացած փաստաթղթերն առգրավելու մասին:
Կարդացեք նաև
ՍՊ ընկերությանը Գյումրիի համայնքապետարանի կողմից տրվել է առևտրի և սպասարկման օբյեկտ կառուցելու համար շինարարության թույլտվություն: Տրված շինթույլտվությունն անվավեր ճանաչելու կամ ընթացող շինարարական աշխատանքների ընթացքը կասեցնելու հարցը քննարկելու համար նախաքննական մարմնի կողմից դեռևս 16.07.2021թ.-ին գրություն է հասցեագրվել Գյումրի համայնքի ղեկավարին: Ըստ վերոնշյալ գործողությունների արդյունքում ձեռքբերվող համապատասխան փաստակազմի, ապացույցների, հիմքերի, իրավական գնահատականներ տալու պայմաններում միայն քրեական գործի շրջանակներում կարող են պարտադիր կերպով դատախազական ներգործության միջոցներ ձեռնարկվել շինարարությունը կասեցնելու ուղղությամբ:
Հարկ է նկատել, որ մարզի դատախազությունն է նախաձեռնել մամուլի հրապարակման առթիվ խնդրո առարկայի վերաբերյալ ուսումնասիրության իրականացումը և քրեական վարույթի հարցման հիմքերի ստուգումը: Իսկ քրեական գործի հարուցման հենց սկզբից վարույթն իրականացնող մարմնի բոլոր գործողությունները գտնվել են մարզի դատախազության ամենօրյա հսկողության ներքո: Հետևաբար` հրապարակման հեղինակի կողմից արվող դիտարկումը, թե «ձևական» քրեական գործ է հարուցվել և մարզի դատախազության կողմից հետևողականություն չի ցուցաբերվում, լիովին հիմնազուրկ է, ինչը մասամբ պայմանավորված է նաև քրեական վարույթի շրջանակներում դատախազության լիազորություններից տեղեկացվածության ակնհայտ պակասով:
ՀՀ գլխավոր դատախազության հանրային կապերի բաժին
