ԱԺ արտահերթ նիստում այսօր երկրորդ ընթերցմամբ քննարկվում է «Պետական սահմանի մասին» ՀՀ օրենքում եւ վարչական իրավախախտումների մասին օրենսգրքում փոփոխությունների օրենսդրական փաթեթը, որը վերաբերում է սահմանային շերտում տեսալուսանկարահանող սարքերի, ԱԹՍ-ների կիրառմանը, սահմանային շերտ մուտք գործելու դեպքերին եւ դրանց առնչությամբ վարչական պատասխանատվության չափ սահմանելուն։
Նախագծի հարակից զեկուցող, «Իմ քայլի» պատգամավոր, ԱԺ պաշտպանության եւ անվտանգության հարցերի հանձնաժողովի նախագահ Արմեն Խաչատրյանը հայտարարեց, որ այս փաթեթով կարգավորում են նախկինում կարգավորում չունեցած հարաբերությունները՝ սահմանային գոտում լուսանկարահանելու, ԱԹՍ օգտագործելու դեպքերը․ «Այսօր սահմանների փոփոխությամբ պայմանավորված՝ շատ դեպքեր են գրանցվում, երբ քաղաքացիները, զբոսաշրջիկներն ԱԹՍ-ներ են օգտագործում, լուսանկարում, տեսանկարահանում, տարբեր մեկնաբանություններ անում սահմանային շերտի վերաբերյալ, ինչն առաջացնում է լուրջ խնդիրներ։ Հետեւաբար, նախագծով սահմանվում է, որ սահմանային շերտում կանոնների խախտումը կպատժվի տուգանքով՝ մինչեւ հարյուր հազար դրամի չափով»։
Լուիզա ՍՈՒՔԻԱՍՅԱՆ
