Հայաստանում Ֆրանսիայի Հանրապետության նորանշանակ դեսպան Անն Լույոն Ֆրանսիայի դեսպանությունում կայացած ասուլիսում ներկայացրեց ֆրանսահայ ռեժիսոր և պրոդյուսեր Սերժ Ավետիքյանի երկլեզու Դրամատիկական արվեստանոցը: Դեսպանն ասաց, որ ուրախ է իրենց հարկի տակ տեսնել դրամատիկական արվեստով այդքան շատ հետաքրքրված մարդկանց, նաեւ հավելեց, որ Սերժ Ավետիքյանն իր տանն է:
«Սա մի հրաշալի նախագիծ է, որտեղ Ֆրանսիական դեսպանությունն իր համեստ ներդրումն ունի այն կայացնելու համար»,-նշեց դեսպանը: Ապա նախագիծը կարեւորեց մի քանի առումներով` դեսպանությունը Հայաստանի համար դժվարին ժամանակներում սիրով է աջակցել երիտասարդներին եւ ստեղծարարությանը: «Սա նաեւ աջակցություն է Ֆրանկոֆոնիային, քանի որ աշխատարանները ֆրանսերենով են»,-նշեց տիկին Լույոն:
Սերժ Ավետիքյանն ասաց, որ առանց Հայաստանում Ֆրանսիայի դեսպանության մշակույթի և համագործակցության հարցերով խորհրդական Գիյոմ Նարժոլեի մասնակցության` նախագիծը հունի մեջ չէր ընկնի: Ռեժիսորն ընդգծեց, որ ուրախ է այս նախագծում Ֆրանսիայի ներկայության համար. «Ուրախ եմ, որ Հայաստանը վերջապես Ֆրանկոֆոն երկիր է, եւ դա կարող ենք առաջ տանել ոչ միայն գրականության, այլեւ արվեստի միջոցով: Ի դեպ, տիկին դեսպանն ասաց, որ դեսպանության ներդրումը համեստ է, սակայն, իրականում ամենամեծ հովանավորը հենց Հայաստանում Ֆրանսիայի դեսպանությունն է»:
Կարդացեք նաև
Ինչ վերաբերում է երկլեզու Դրամատիկական արվեստանոցին, այն դերասան, ռեժիսոր և պրոդյուսեր Սերժ Ավետիքյանի՝ Ֆրանսիայի և Հայաստանի միջև վերջին տասնամյակների աշխատանքի արդյունքում մտահղացված նախագիծ է, որի նպատակն է հայ երիտասարդ արտիստներին հնարավորություն ընձեռել սովորել և կատարելագործել դրամատիկական արվեստի տեխնիկաները՝ ֆրանսիացի պրոֆեսիոնալ ռեժիսորների, բեմադրիչների և դերասանների հետ, որոնք կժամանեն Հայաստան բերելով իրենց` հարստացնող փորձը եւ տարբերվող տեսլականը։ Նախագծի մաս է կազմում նաև հայաստանաբնակ ֆրանսախոս թիմը՝ այդ թվում ֆրանսերենի ուսուցիչներն ու թարգմանիչները: Նախագծին աջակցում է նաեւ «Ազնավուր» հիմնադրամը` ի դեմս Նիկոլա Ազնավուրի:
Գիյոմ Նարժոլեն նշեց, որ երբ Սերժ Ավետիքյանը ներկայացրել է նախագիծը, իրենք ոչ միայն ոգեւորվել են, այլեւ պարտավորված են զգացել աջակցել դրա իրականացմանը: «Լեզուներ, արվեստ, մշակույթ` սրանք այն երեւույթներն են, որոնք թույլ են տալիս երազել, որ կյանքը շարունակվում է»,-ընդգծեց նա:
Սերժ Ավետիքյանը հավելեց, որ նախագիծը ունի 6 ամսվա տեւողություն, այժմ ինքն է վարպետության դասընթաց անցկացնում, հետագայում կժամանեն տարբեր արվեստագետներ, այդ թվում`«Օդեոն» թատրոնի տնօրենը, որի սիրած հեղինակը Չեխովն է, եւ Հայաստանում ֆրանսիական ոճով Չեխով կներկայացվի: Հունվարին երիտասարդների հետ, որոնց թվում նաեւ արցախցիներ կան, կաշխատի ֆրանսիացի դերասանուհի, սցենարիստ, «Ճանապարհորդություն դեպի Հայաստան ֆիլմի սցենարի համահեղինակ» Արիան Ասկարիդը: Սերժ Ավետիքյանը ժպտալով կրկին ընդգծելով աշխատարանների ֆրանսերեն լեզվով իրականացումը` ասաց, որ Ասկարիդը հայերեն միայն մեկ բառ գիտի` դա վարսավիրանոցն է:
Գոհար ՀԱԿՈԲՅԱՆ
