Հայաստանը գրավոր ընթացակարգով դիմե՞լ է ՀԱՊԿ-ին, նրանք կատարո՞ւմ են իրենց պարտավորությունները ՀՀ-ի նկատմամբ: Այսօր ֆեյսբուքյան էջի ուղիղ եթերում պատասխանելով այս հարցին՝ վարչապետ Նիկոլ Փաշինյանն ասաց. «Մենք մայիսի 12-ի իրադրության վերաբերյալ ե՛ւ ՀԱՊԿ-ին, ե՛ւ ՌԴ-ին դիմել ենք»: Երբ ճշտեցին, խոսքը նոյեմբերի 16-ի իրադարձության մասին է՝ Փաշինյանը պատասխանեց. «Գիտեք, նոյեմբերի 16-ին իրադարձությունը մայիսի 12-ի իրադարձության շրջանակներում է տեղի ունենում, երբ ադրբեջանական ԶՈՒ-ն ներխուժեց ՀՀ տարածք»:
Փաշինյանն ասաց, որ Հայաստանը չի սահմանափակելու իրեն ու իր իրավունքները պաշտպանելու է հետեւողականորեն միջազգային բոլոր ատյաններում. «Պետք է գնալ լուծումների եւ մեր կառավարության առաքելություն է գնալ լուծումների: Մենք պատրաստ ենք, գնալու ենք, բանակցելու են, չարչարվելու ենք, մեր վրա վերցնելու ենք պատասխանատվություն եւ գնալու ենք լուծումների, բայց սա չի նշանակում, թե Հայաստանը գործելու է պարտադրանքի ներքո: Բոլոր միջազգային լծակները, ֆորմատները օգտագործելու ենք»:
Հռիփսիմե ՋԵԲԵՋՅԱՆ
