«Զինծառայողների ապահովագրության հիմնադրամ»-ը փոխհատուցել է 4660 զինծառայողների և նրանց ընտանիքների անդամներին: Փոխհատուցումների մեծամասնությունը 44-օրյա պատերազմի հետևանքով գրանցված վնասներին է վերաբերվում: Մինչև 44-օրյա պատերազմը 416 անձ է ստացել փոխհատուցում»,- «Արմենպրես» լրատվական գործակալության մամուլի սրահում տեղեկացրեց «Զինծառայողների ապահովագրության հիմնադրամ»-ի փոխհատուցումների գծով փոխտնօրեն Սմբատ Սաիյանը:
Նա շեշտեց՝ ըստ էության հիմնադրամը զուտ գումար վճարողն է, այն խողովակ է, որի միջոցով գումարը հասնում է շահառուներին, մնացած գործընթացները տեղի են ունենում համապատասխան մարմիններում, որտեղ անձը ծառայել է կամ հաշմանդամություն գրանցել: Սմբատ Սաիյանը հայտնեց. «Հիմնադրամը չունի լիազորություններ կամ գործառույթներ, որոնք կվերաբերեն շահառուների հայտնաբերման և հատուցման գործընթացում ընդգրկելուն: Ուժային մարմիններից ենք ամբողջական տեղեկատվություն ստանում: Այս պահին հիմնադրամում չկա գեթ մեկ շահառուի գործ, ում տվյալներն ամբողջական մեզ տրվել են, և հատուցումը մենք չենք վճարել»:
«Զինծառայողների ապահովագրության հիմնադրամ»-ի փոխհատուցումների գծով փոխտնօրենը վստահեցրեց՝ այսօր հիմնադրամն այլևս չունի կառավարման խնդիր, և հեշտ կարողանում են հատուցումների գործընթացն ապահովել: Միակ խնդիրը հիմնադրամի գործառույթների նկատմամբ շահառուների ոչ հստակ պատկերացումներն են: Տպավորություն է, որ հիմնադրամն է կայացնում բոլոր հիմնական որոշումները, շրջանակը որոշում, բայց այդպես չէ: Շահառուների շրջանակը սահմանվում է օրենսդրությամբ, և կիրարկող մարմինն են հանդիսանում այն մարմինները, որտեղ ծառայել են զինծառայողները: Ուզում եմ շեշտել՝ հիմնադրամը որոշում չի կայացնում շահառու ճանաչելու վերաբերյալ»:
«Զինծառայողների ապահովագրության հիմնադրամ»-ի ֆոնդհայթայթման և դոնորների հետ հարաբերությունների մասնագետ Սոնա Բաղդասարյանը 2021-ը համարեց հիմնադրամի համար փոխակերպումների տարի, քանի որ արդեն ձևավորվել է պրոֆեսիոնալ թիմ, և ունեն նոր հոգաբարձուների խորհուրդ: Սոնա Բաղդասարյանը փաստեց. «Պատերազմը մտել է բոլորի տներ. բոլորն ունեն ընտանիքի անդամ, հարևան, բարեկամ, որն ինչ-որ կերպ առնչվել է պատերազմի հետ, հետևաբար հիմնադրամի առաքելության մասին տեղեկացվածության աստիճանը բավականին բարձր է»:
Կարդացեք նաև
Սոնա Բաղդասարյանը, սակայն, նկատեց՝ սփյուռքում լավ չեն պատկերացնում հիմնադրամի մոդելի առանձնահատկությունը:
Ասուլիսի ընթացքում նաև իրազեկվեց, թե ինչպես կարելի է նվիրաբերություն կատարել հիմնադրամին: Կարելի է կատարել ամսական նվիրատվություն, կարելի է քարտը կցելով մեկանգամյա նվիրաբերություն կատարել՝ ԱՄՆ դոլարով, եվրոյով, դրամով, կարելի է նվիրատվություն կատարել նաև բանկային փոխանցումների միջոցով:
Հարցին՝ նվիրաբերություն կատարողների թիվն աճո՞ւմ է, Սոնա Բաղդասարյանը պատասխանեց. «Ցավոք, պատերազմի պատճառով նվիրաբերողների թիվն աճել է. դինամիկան դրական է: Եվ հատկապես այս տարվա կտրվածքով. ամեն ամիս ավելի շատ ամսական նվիրաբերություններ ենք ունենում, քան նախորդ ամսվա ընթացքում»:
Տաթև ՀԱՐՈՒԹՅՈՒՆՅԱՆ
