«Տպավորություն կա, որ Ռուբեն Ռուբինյանին ուզում են օժտել անձեռնմխելիության եւս մեկ շերտով․ հանկարծ իրեն չքննադատենք, որովհետեւ նա բանագնացն է, ուրեմն չի կարելի։ Չի կարելի նաեւ քննադատել, թե նա ինչ օրակարգով է բանակցում, ի՞նչ իրավակարգավորումներով է նշանակվել»,-ԱԺ լիագումար նիստում այսօր խոսելով ՀՀ-Թուրքիա երկխոսության հայկական կողմի հատուկ ներկայացուցիչ, ԱԺ փոխնախագահ Ռուբեն Ռուբինյանի մասին՝ ասաց «Հայաստան» դաշինքի պատգամավոր Գեղամ Մանուկյանը։
Նրա խոսքով՝ իրենք Ռուբինյանին անձնապես չեն քննադատում, թեեւ երեկվա միջադեպը հաշվի առնելով՝ կարելի է ասել․ «Պարոն Ռուբինյան, նման թույլ նյարդային համակարգով ինչպե՞ս կարելի է ՀՀ-ն ներկայացնել նման դժվար բանակցային գործընթացում։ Քննադատվում են բոլոր այն գործողությունները, որոնց արդյունքում հիմա ՀՀ-ն ներկայացնում է ԱԺ փոխնախագահը։ Ի՞նչ կարգավիճակ ունի նա, մինչեւ հիմա դա հստակ չէ, ի՞նչ լիազորություններով է նա ներկայացնում ՀՀ-ին, մշակվե՞լ է աշխատանքային կանոնակարգ այդ բանակցություններում»։
Լուիզա ՍՈՒՔԻԱՍՅԱՆ
