Գրատենի՝ սպիտակ թանձրուկով եւ պանրով եփված բրոկոլիի եւ ծաղկակաղամբի այլ տարբերակներ տարիներ առաջ ներկայացրել ենք այստեղ եւ այստեղ: Այսօրվա տարբերակում կաղամբազգիները՝ բրոկոլին, բրյուսելյան կաղամբն ու ծաղկակաղամբը բեշամել թանձրուկով են, պանրով եւ պեստո սոուսով: Արտակարգ համեղ ուտեստ էր ստացվել:
Անհրաժեշտ մթերքները
Ծաղկակաղամբ, բրոկոլի եւ բրյուսելյան կաղամբ- յուրաքանչյուրից 0,5 կգ (կարող եք վերցնել միայն մի կամ երկու տեսակը)
Պանիր՝ ցանկացած տեսակի -մոտ մեկ բաժակ
Կարդացեք նաև
Պեստո թանձրուկ– 2 ճաշի գդալ
Բեշամել թանձրուկի համար՝
Կաթ-0,5լիտր
Կարագ-50 գրամ
Ալյուր-2 ճաշի գդալ
Մշկընկույզ (мускатный орех)- 1/4 թեյի գդալի չափ
Պատրաստման եղանակը
Բանջարեղենը նախապես թեթեւակի՝ 2-3 րոպեով խաշում ենք աղ արած ջրի մեջ, այսպես ասած՝ «վախեցնում» ենք:
Ապա պատրաստում ենք բեշամել թանձրուկը: Ալյուրը բովում ենք կարագով, քիչ-քիչ ավելացնում կաթը: Անընդհատ խառնում ենք, մինչեւ զգանք, որ պնդանում է, անջատում ենք եւ ավելացնում մշկընկույզը:
Խոշոր անցքերով քերիչով քերում ենք պանիրը: Կարող եք վերցնել ինչպես մի տեսակի, այնպես էլ՝ մի քանի տեսակի պանիրներ:
Պեստո թանձրուկն (ի դեպ, կարող եք ինքներդ պատրաստել, պատրաստման եղանակը՝ այստեղ) ավելացնում ենք բեշամելի վրա, լավ խառնում: Ջեռոցի հրակայուն ամանի մեջ մի փոքր թանձրուկ ենք լցնում, ապա դասավորում բանջարեղենը, վրայից լցնում մնացած թանձրուկը, դրա վրայից՝ պանիրը եւ դնում նախապես 200 աստիճան տաքացրած ջեռոցը մոտ 20-30 րոպեով:
Մանրամասները՝ տեսանյութում.
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
