Ֆրանսիական այս ճաշատեսակը՝ գրատենը, իրենից ներկայացնում է կաթնասերուցքային թանձրուկով բանջարեղեն՝ պատրաստված ջեռոցում՝ վրայից պանրի կամ պաքսիմատի շնորհիվ առաջացած խրթխրթան շերտով: Շատ նման է սլավոնական «զապեկանկային»: Ամենահայտնին կարտոֆիլով գրատենն է, սակայն ամենահամեղը, ըստ իս, ծաղկակաղամբովն է:
Անհրաժեշտ մթերքները
Ծաղկակաղամբ- 1 փոքրիկ գլուխ
Բրոկոլի-1 գլուխ
Բարձր յուղայնության կաթնասեր (կարող եք մի մասը թթվասեր վերցնել)- 200 գրամ
Ձու-3 հատ
Պինդ դեղին պանիր-100 գրամ
Կարագ – 50 գրամ
Համեմունքներ – ըստ ճաշակի
Պատրաստման եղանակը
Կարդացեք նաև
Ծաղկակաղամբն ու բրոկոլին լավ լվացեք, մասնատեք: Բնականաբար, կարող եք վերցնել միայն ծաղկակաղամբ կամ միայն բրոկոլի: Մեծ կաթսայի մեջ ջուր եռացրեք, մեկ ճաշի գդալ աղ լցրեք եւ 2-3 րոպեով արագ խաշեք բանջարեղենը: Կարող եք ոչ թե խաշել, այլ գոլորշու վրա արագ պատրաստել, այդ պարագայում կպահպանի ե՛ւ գույնը, ե՛ւ վիտամինների գոնե մի մասը: Դրա համար հարկավոր է եռացող ջրով լի կաթսայի վրա դնել ցանց կամ փլավքամիչ, բանջարեղենը դնել մեջը, կափարիչով փակել: Զգույշ եղեք, որ ջրի մեջ չմտնի ցանցը, որպեսզի բանջարեղենը հենց գոլորշիով եփվի եւ ոչ թե ջրով խաշվի: Երեք-չորս րոպեն լրիվ բավարար է:
Նկատենք, որ բանջարեղենը պետք է կիսահում, խրթխրթան մնա, չթողնեք շատ փափկի:
Պատրաստեք թանձրուկը: Ձուն լավ հարեք, ավելացրեք կաթնասերը կամ կաթնասերի ու թթվասերի խառնուրդը, եթե կաթնասեր չունեք եւ կաթ եք ավելացնելու, կարող եք 1-2 գդալ ալյուր էլ ավելացնել: Ապա ավելացրեք քերած պանրի կեսն ու համեմունքները՝ սեւ եւ կարմիր պղպեղ, չորացրած կանաչի՝ ըստ ձեր ճաշակի, քարրի կամ շաֆրան, կամ խմելի սունելի եւ այլն:
Ջեռոցի համար նախատեսված հրակայուն ամանի հատակը լավ կարագոտեք (ցանկալի է վերցնել գեղեցիկ տարա, որով էլ հենց կմատուցեք գրատենը՝ այդպես է ընդունված), մեջը տեղավորեք ծաղկակաղամբի եւ բրոկոլիի ծաղկաբույլերը, վրան մի քանի կտոր կարագ դրեք (քանի որ կերակրատեսակը ֆրանսիական է՝ կարագը մի խնայեք), առատորեն լցրեք թանձրուկը, վրայից էլ՝ քերած պանրի մնացած կեսը:
Դրեք 200 աստիճան տաքացրած ջեռոցը մինչեւ երեսը լավ կարմրի՝ մոտ 20-25 րոպե: Մատուցեք տաք վիճակում:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
17.09.2016
Մելան ջան, քո բաղադրատոմսերը հրաշք են: Ես միշտ մեծ ոգեւորությամբ պատրաստում եմ դրանք: Ընտիր բաներ են ստացվում ու համով լինելուց բացի ստեղծում են նաեւ տոնական տրամադրություն: Շատ շնորհակալություն քեզ:
Անչափ շնորհակալ եմ ջերմ խոսքերի համար, որոնք իմ տրամադրությունն էլ տոնական դարձրին: Շատ ուրախ եմ, որ կարդում եք եւ առավել եւս՝ պատրաստում այս բաղադրատոմսերով: