Այսօր ԱԺ պաշտպանության եւ անվտանգության հարցերի հանձնաժողովի նիստում ՔՊ պատգամավոր Հայկ Սարգսյանը ներկայացրեց, թե ինչ են որոշել անել՝ զորակոչի խնդիրը լուծելու համար: Նա առաջարկում է ընդդիմության հետ քննարկել ու պարտադիր զինծառայություն չանցած, 27 տարին լրացած քաղաքացիներին, որոնք կգան ՀՀ ու կստանան ՀՀ քաղաքացիություն, տանեն մեկամսյա ծառայության. «Տղան ՌԴ-ում է, ազգությամբ հայ է, սպասում է 27 տարին լրանա, նոր՝ գալիս ու ստանում է ՀՀ քաղաքացիություն, ոչ մի օր չի ծառայում: Մենք իրենց թողել ենք ու զոհվածի որդուն ենք ասում՝ չէ, դու մի ազատվիր ծառայությունից: Աչքաթող ենք անում ավելի մեծ քանակությամբ քաղաքացիների, ովքեր քաղաքացիություն են ստանում ու ոչ մի օր չեն ծառայում: Այսօր ՀՀ քաղաքացիություն ստանալը դարձել է մեծ պատիվ ու հնարավորություն, թող բարի լինեն գան մեկ ամիս առնվազն ծառայեն, համազգեստը հագնեն, ունենան բանակի ընկերներ, դրանից հետո միգուցե չլքեն հայրենիքը, հասկանան, որ Հայաստանը բոլորիս հայրենիքն է: Օգտվելով ՀՀ բոլոր բարիքներից՝ նաեւ պետք է ծառայեն ՀՀ-ին՝ ոչ միայն դրսից գումարներ ուղարկելով»:
Պատգամավորի խոսքով՝ այսօր հարյուրավոր քաղաքացիներ հերթ են կանգնած, որ ստանան ՀՀ քաղաքացիություն, ուստի նրանց առաջ մեկամսյա պարտադիր ծառայության պայման է դրվելու. «Անընդունելի է հարյուրավոր քաղաքացիներին 27 տարեկանից հետո տալ ՀՀ քաղաքացիություն, իսկ զոհվածի ընտանիքի անդամներն ասել՝ «չէ, ախպեր ջան, պետք է ծառայես»:
Կարդացեք նաև
Հռիփսիմե ՋԵԲԵՋՅԱՆ
