«Եռագոյն». Առաւել քան 400 անձեր մասնակցեցան Շաբաթ, 9 Ապրիլին տեղի ունեցած առցանց ձեռնարկին, որուն ընթացքին Արեւմտեան Ամերիկայի Հայ Դատի յանձնախումբի Կրթական հարցերու բաժանմունքը մեծարեց Հայոց Ցեղասպանութեան օրինակելի դասաւանդման նպաստող 11 ուսուցիչներ եւ զօրակիցներ։
Ձեռնարկին բացումը կատարեց կրթական հարցերու բաժանմունքին հետ Արեւմտեան Ամերիկայի Հայ Դատի յանձնախումբի վարչութեան կապը հանդիսացող իրաւաբան Անահիտ Օշական, որ բարի գալուստ մաղթելէ ետք ներկաներուն ամփոփ կերպով ներկայացնելով Հայ Դատի գործունէութիւնը, որմէ ետք, կրթական հարցերու բաժանմունքին ատենապետ Ալիս Պետրոսեան խօսեցաւ բաժանմունքին տարած աշխատանքներուն մասին։
Այնուհետեւ սկսաւ մրցանակներու յանձնումը։
Արեւմտեան Ամերիկայի Հայ Դատի յանձնախումբի ժամանակաւոր գործադիր վարիչ Վերժինի Թուլումեան Հենրի Մորկընթաուի անուան մրցանակը յանձնեց Լոս Անճելըսի միացեալ կրթաշրջանին մէջ Ցեղասպանութեան դասաւանդման մեծապէս նպաստած կրթաշրջանի վարչութեան ատենապետ Քելի Կոնեզին, նոյն ժամանակ յատուկ շնորհակալութիւն յայտնելով այդ ջանքերուն աջակցող Կոնեզի գրասենեակէն Էզմերալտա Մարսիալին, Չերիթի Քասթրոյին եւ Մայքըլ Մենհիվարին։
Այնուհետեւ, Կրթական հարցերու բաժանմունքէն Լուսի Մարտիրոսեան, Լօրա Կապուտեան եւ Զարիկ Յակոբեան Զարուհի «Սարա» Չիթճեանի անուան մրցանակները յանձնեցին Կլենտէյլի «Ճեֆըրսըն» նախակրթարանի տնօրէն Արմինէ Ալեքսանին, Կլենտէյլի «Քլարք» երկրորդական վարժարանի ուսուցիչ Փեթրիք Տաւարհանեանին եւ Պըրպենքի «Ճան Պըրոզ» երկրորդական վարժարանի ուսուցիչ Շաքէ Ժագլին Պալեանին։
Կրթական հարցերու բաժանմունքի փոխատենապետ Սեդա Անթեքելեան եւ բաժանմունքի անդամ Քաթիա Քարակէօզեան «Հայոց Ցեղասպանութեան դասաւանդման» մրցանակը յանձնեցին Մայքըլ Քանինկհեմին (Թեքսասի Տէլ Վէյլի երկրորդական վարժարան) եւ դոկտ․ Տէյվիտ Հարմզին (Օհայոյի «Փենթա» վարժարան)։
Նաեւ, կրթական հարցերու բաժանմունքէն Արփի Գրիգորեան Ռիչըրտ Յովհաննէսեանի անուան մրցանակը յանձնեց Ֆրեզնոյի նահանգային համալսարանի դասախօս դոկտ․ Մեթիու Ճենտեանին, իսկ Անահիտ Օշական «Հայոց Ցեղասպանութեան դասաւանդման ժառանգութեան» մրցանակը յանձնեց յայտնի ցեղասպանագէտ դոկտ․Ալֆրետ Տէ Զայսին (Ժընեւի Դիւանագիտութեան համալսարան)։
Մրցանակակիրները շնորհակալութիւն յայտնեցին իրենց շնորհուած պատիւին համար, շեշտելով տարբեր մակարդակներու վրայ Հայոց Ցեղասպանութեան դասաւանդումները ընդարձակելու կարեւորութիւնը։
Աւարտին, ձեռնարկը կազմակերպած յանձնախումբի ատենապետ Թալին Արսէնեան շնորհաւորեց մրցանակներ ստացողներուն եւ շնորհակալութիւն յայտնեց ձեռնարկին յաջողութեան նպաստած բոլոր անձնաւորութիւններուն եւ կազմակերպութիւններուն։
