«Ըստ ՊՆ կայքի՝ 70 պետական պաշտպանության, բանակի գույք հանված է վաճառքի, այդ թվում՝ զորամասեր, եւ հանրությունը տեղյակ էլ չի։ Փաշինյանն ինչ ուզում՝ անում է։ Ցրվել են զորամասեր, կրճատվել է բանակի թիվը, չէ՞ որ նա ասել է, որ միայն սահմանապահ ուժեր ենք ունենալու»,- Ազատության հրապարակում այսօր Նիկոլ Փաշինյանի հրաժարականի պահանջով եւ ՀՀ-ն ու Արցախը փրկելու գաղափարի շուրջ համախմբման բողոքի գործողությունների ժամանակ լրագրողների հետ ճեպազրույցում ասաց 5165 շարժման համահիմնադիր Կարին Տոնոյանը։
Նա հարցադրում արեց․ «Կա՞ որեւէ հայ, որ գոյությունը պատկերացնում է առանց բանակի, նա բանակը վերացնում է, պատկերացնո՞ւմ եք՝ եթե հիմա այդ զորամասերը վաճառվում են, հետո դա մեր վրա ի՞նչ է նստելու։ Մի անգամ արդեն Լեւոն Տեր-Պետրոսյանի ժամանակ տեսել ենք սեփականաշնորհման աղետալի հետեւանքները, հիմա էլ նույնն է կատարվում։ Այնքան ակնառու է երկրի քանդումը։ Ամենավտանգավորն այն է, որ բանակը վերացնում են, ժողովուրդ, գոնե հանուն բանակի դուրս եկեք փողոց»։
Կարին Տոնոյանը նաեւ հարցադրում արեց՝ կարծում եք, թե միայն սահմանապահով կարող եք թուրքի դեմն առնե՞լ։
Լուիզա ՍՈՒՔԻԱՍՅԱՆ
