Այսօր ԱԺ առողջապահության հարցերի հանձնաժողովի նիստում քննարկվեց ՔՊ պատգամավորներ Նարեկ Զեյնալյանի եւ Էմմա Պալյանի հեղինակած «Բնակչության բժշկական օգնության եւ սպասարկման մասին» օրենքում լրացումներ կատարելու նախագիծը:
Էմմա Պալյան
Ինչպես ներկայացրեց Պալյանը, գործող օրենքի 16-րդ հոդվածի 1-ին մասով բժշկական միջամտության համար պարտադիր պայման է մարդու գրավոր համաձայնությունը, բայց երկրորդ մասով սահմանվում է, որ բժշկական միջամտության համար գրավոր համաձայնություն տալու դեպքերը սահմանում է լիազոր մարմինը. «Հասկանալի չէ, թե որ դեպքերի համար է անհրաժեշտ գրավոր համաձայնություն: Նախագծով առաջարկում ենք տարընթերցումները բացառելու համար հստակ սահմանել, որ մարդու գրավոր համաձայնությունը անհրաժեշտ կլինի միայն լիազոր մարմնի սահմանած դեպքերի համար»:
Նարեկ Զեյնալյան
Նարեկ Զեյնալյանն էլ հավելեց, որ բժշկական միջամտություն ասածի տակ մենք հասկանում ենք բոլոր այն դեպքերը, երբ բժիշկը հարաբերվում է պացիենտի հետ, ընդհուպ մինչեւ ջերմաչափում, ճնշման չափում, ուստի օրենքի ձեւակերպումը ենթադրում էր, որ անգամ ջերմություն չափելու համար բժիշկը պետք է գրավոր համաձայնություն ստանար, ինչը տրամաբանական չէր:
Առողջապահության փոխնախարար Արմեն Նազարյանն ասաց, որ կառավարությունը դրական եզրակացություն է տվել, քանի որ նախագծով ավելի հասկանալի է դառնում հոդվածը:
Կարդացեք նաև
Հռիփսիմե ՋԵԲԵՋՅԱՆ
