«Վերիշենում, Ակներում՝ ոչ մի խուճապ»,- սեպտեմբերի 15-ին լրագրողների հետ զրույցի ընթացքում ասաց Վերիշեն համայնքի վարչական ղեկավար Արտակ Զադայանը։
Նա նշեց, որ սեպտեմբերի 14-ի երեկոյան ժամը 8-9-ից ոչ մի կրակոց չի եղել. «Գյուղում խուճապ չկա։ Մի քանի ընտանիք մանկահասակ երեխաներին տարհանել են Գորիս, մեկ էլ մեր քարանձավները»։
Արտակ Զադայանը նշեց, որ գյուղում չորս բնակելի տուն է վնասվել. «4, թե 5 հրթիռ ընկել է գյուղը, բացի դրանից` գյուղից 700-800 մետր վերև հարյուրավոր հրթիռներ են ընկել։ Երեկ ժամը երեքի կողմերը մի քաղաքացիական անձ ունենք վիրավոր. մեր տղերքին օգնելու պահին երեք հատ արկ է ընկել այդ պահին։ Ներկա պահին հիվանդանոցում է, բեկորային վնասվածք է ոտքից, կյանքին վտանգ չի սպառնում»։
Կարդացեք նաև
Նա ընդգծեց, որ նման բան չի եղել ո՛չ Ապրիլյան, ո՛չ 44-օրյա պատերազմների ընթացքում. «Մեկ էլ 90-ականներին է եղել, երկու զոհ ենք ունեցել»։
Արտակ Զադոյանի խոսքով՝ այժմ գյուղի բնակիչները վերադարձել են իրենց առօրյա կյանքին։
Վարչական ղեկավարը մտահոգված է, որ Վերիշեն և Ակներ գյուղերը սահմանամերձ չեն ճանաչվում. «Ես մարզպետի հետ էլ եմ խոսել, ասաց՝ կառավարությանը դիմել ենք, մինչև հիմա պատասխան չկա»։
Նա նշեց, որ չի հասկանում, թե ինչու գյուղերը սահմանամերձ չեն ճանաչվում. «Վերիշենի վարչական տարածքից մոտ 1500 հա 2021 թվականի մայիսի 12-ից Ադրբեջանի վերահսկողության տակ է։ 8.4կմ հատված ունենք Ադրբեջանի Հանրապետության տարածքի հետ։ Զուտ Վերիշենի վարչական տարածքը։ Մոտավորապես 1.3կմ էլ Ակները ունի։ 10կմ հատված է՝ Վերիշեն, Ակներ՝ Սև լճի ամբողջ երկայնքով»։
Ամի ՉԻՉԱԿՅԱՆ
