«Քաղաքացիական պայմանագիր» խմբակցությունը ԿԸՀ նախագահի պաշտոնում առաջադրել է իր արդեն նախկին թիմակից, ՔՊ կուսակցության վարչության արդեն նախկին անդամ Վահագն Հովակիմյանի թեկնածությունը։ Օրեր առաջ Հովակիմյանը, որը եղել է նաեւ ԱԺ պետաիրավական հարցերի հանձնաժողովի նախագահի տեղակալ, հրաժարականի դիմում է ներկայացրել ԱԺ նախագահին, նաեւ դուրս եկել կուսակցությունից, ինչպես օրենքն է պահանջում։
Հանձնաժողովում այսօր ներկայացվեց նրա թեկնածությունը։ «Հանձնաժողովի անդամներն իմ որակները ու սկզբունքները լավ գիտեն։ Մասնագիտացված զբաղվել եմ ընտրական օրենսդրությամբ, ՀՀ-ում արդար ու թափանցիկ ընտրություններ անցկացնելու գործում աշխատել եմ իմ լուման ունենալ»,-հայտարարեց Վահագն Հովակիմյանը։
«Բոլոր տարիներին ազատ, արդար, թափանցիկ ընտրությունների անցկացումն իմ համար եղել է առաջնային, կյանքի սկզբունք, որը շարունակում եմ եւ կշարունակեմ։ Դա համարում եմ մեր երկրի համար կարեւորագույն գործոն։ Թափանցիկ եւ մրցակցային ընտրությունները կանխորոշում են մեր ապագան»,-համոզմունք հայտնեց Վահագն Հովակիմյանը։
Հատկանշական է, որ հանձնաժողովի անդամներից որեւէ մեկը նրան հարցեր չուներ, ելույթներ նույնպես չեղան․ նիստին մասնակցում էին միայն ՔՊ-ական պատգամավորները։ Առաջիկայում Հովակիմյանի թեկնածության հարցը կքննարկվի ԱԺ նիստում։
Կարդացեք նաև
Լուիզա ՍՈՒՔԻԱՍՅԱՆ
