Այսօր երեկոյան՝ Երևանի ժամանակով ժամը 18։00-ից սկսած Եվրոպայի խորհրդի խորհրդարանական վեհաժողովի (ԵԽԽՎ) աշնանային նստաշրջանի լիագումար նիստի ընթացքում կկազմակերպվի «Ռազմական գործողությունները Հայաստանի և Ադրբեջանի միջև, ներառյալ հարվածներ բնակավայրերին և քաղաքացիական ենթակառուցվածքներին» թեմայով ընթացիկ հարցերի շուրջ բանավեճ։
Նշենք, որ հոկտեմբերի 10-ին Ստրասբուրգում մեկնարկեց ԵԽԽՎ աշնանային նստաշրջանը։ Այն կընթանա մինչև հոկտեմբերի 14-ը։
ԵԽԽՎ նախագահ Թինի Քոքսը տեղեկացրեց, որ ստացվել է մի քանի թեմայով բանավեճ անցկացնելու մասին առաջարկ։ Օրինակ՝ «Եվրոպան Ուկրաինայի դեմ Ռուսաստանի ագրեսիվ պատերազմի մեկնարկից կես տարի անց», «Եվրոպայում պարենային անվտանգությունը. հացահատիկի արտահանումը ուկրաինական նավահանգիստներով», «Ռազմական գործողությունները Հայաստանի և Ադրբեջանի միջև», «Ռազմական գործողությունները Հայաստանի և Ադրբեջանի միջև՝ ներառյալ հարվածներ բնակավայրերին և քաղաքացիական ենթակառուցվածքներին»։
Թինի Քոքսը նշեց, որ Բյուրոն առաջարկել է ընթացիկ հարցերի շուրջ քննարկում կազմակերպել «Եվրոպան Ուկրաինայի դեմ Ռուսաստանի ագրեսիվ պատերազմի մեկնարկից կես տարի անց» և «Ռազմական գործողությունները Հայաստանի և Ադրբեջանի միջև, ներառյալ հարվածներ բնակավայրերին և քաղաքացիական ենթակառուցվածքներին» թեմաներով։
Կարդացեք նաև
Վեհաժողովի անդամները միաձայն ընդունեցին Բյուրոյի առաջարկը։
Թինի Քոքսի փոխանցմամբ՝ Բյուրոն առաջարկել է «Ռազմական գործողությունները Հայաստանի և Ադրբեջանի միջև, ներառյալ հարվածներ բնակավայրերին և քաղաքացիական ենթակառուցվածքներին» թեմայով զեկուցող նշանակել ԵԽԽՎ պատվիրակ Փոլ Գավենին։
Տաթև ՀԱՐՈՒԹՅՈՒՆՅԱՆ