Կրծքագեղձի քաղցկեղը կանանց շրջանում ամենատարածված հիվանդությունն է աշխարհում, սակայն այն դատավճիռ չէ: Վաղ ախտորոշումը բարձրացնում է բուժման հավանականությունը:
Այս իրազեկմամբ այսօր ՀՀ առողջապահության նախարարությունը Ազատության հրապարակից քայլերթ էր կազմակերպել`գեղեցիկ սեռի ներկայացուցիչներին կոչ անելով չհապաղել, հետազոտվել հնարավորինս արագ՝ վստահեցնելով, որ նրանք միայնակ չեն եւ որ հնարավոր է դարի հիվանդությանը հաղթել միասին:
Քայլերթին մասնակցում էր նաեւ առողջապահության նախարար Անահիտ Ավանեսյանը, որը բուժաշխատողների հետ միասին նաեւ իրազեկման թերթիկներ էր բաժանում երեւանցիներին: Ակցիայի ավարտին տիկին Ավանեսյանը ասաց, որ հոկտեմբեր ամիսն ամբողջ աշխարհում կրծքագեղձի քաղցկեղի իրազեկման ամիս է եւ նախարարությունը, բուժաշխատողները, պացիենտները, որոնք անցնում են բուժման կուրսը, ակտիվ աշխատանք են կատարել, որպեսզի կանայք հետազոտվեն: Այս մեկ ամսվա ընթացքում միջոցառումները ուղղված են եղել` քաջալերելու, իրար սատար կանգնելու, ոգեւորելու, որ տարին մեկ անգամ հետազոտվեն, որպեսզի հիվանդությունը հնարավորինս վաղ հայտնաբերվի: Նախարարը նշեց նաեւ, որ միայն Երեւանով չեն սահմանափակվում: Մասնավորապես, վերջին երկու տարիներին Լոռու եւ Տավուշի մարզերում իրականացրել են անվճար հետազոտություններ, իսկ ներկայումս էլ իրենց մամոգրաֆիկ կայանը տեղավորված է Սիսիան քաղաքում եւ սպասարկելու է ամբողջ մարզը: Այդպես շարունակաբար իրենք անցնելու են բոլոր մարզերով` անվճար հետազոտելով բոլոր կանանց:
Կարդացեք նաև
Aravot.am-ի հարցին, թե միամսյակից դուրս տարվա ընթացքում ինչ աշխատանքներ են իրականացվում կրծքագեղձի քաղցկեղը հայտնաբերելու եւ դրա զարգացումը կանխարգելելու համար, Անահիտ Ավանեսյանը պատասխանեց. «Աշխատանքները մի քանի ուղղություններով են իրականացվում: Նախ, իրազեկումը, կանխարգելիչ հետազոտությունները, առողջ ապրելակերպի քաջալերելը, որովհետեւ կան ռիսկի գործոններ, որոնք նպաստում են քաղցկեղի զարգացմանը: Դրանք են. պասիվ կենսակերպը, անառողջ սնունդը, ծխելը եւ այլն: Եվ այս ամենի դեմ պայքարը նրա համար է, որպեսզի կարողանանք հնարավորինս երկար պահպանել քաղաքացու առողջությունը:
Բայց, իհարկե, միայն դրանով չենք սահմանափակվում: Կարեւոր է նաեւ բուժման կուրսի մեջ պետության ակտիվ աջակցությունը արդեն պացիենտներին: Այս առումով ավելացել են թե դեղորայքային բուժման փաթեթները, թե վիրահատական ամբողջ միջոցառումներն են իրականացվում պետպատվերի շրջանակում: Մենք ունենք դիմելիության բավականին աճ, ինչը ցույց է տալիս, որ այս ծառայությունները ավելի հասանելի են դարձել կանանց համար»։
Լրացուցիչ հարցին, թե մարզերում ծավալվող աշխատանքներից բացի հիմա Արցախում ինչ-որ բան արվո՞ւմ է, նախարարը պատասխանեց. «Տեսեք, ասացի, որ Սյունիքում տեղակայված է մամոգրաֆիական հետազոտության կայանը: Այն սպասարկելու է նաեւ Արցախի բնակչությանը: Մենք Արցախի առողջապահության նախարարության հետ ինտենսիվ աշխատում ենք միասնական ծրագրերի շրջանակներում եւ նրանք օգտվում են ամբողջ փաթեթներից»։
Աշոտ ՀԱԿՈԲՅԱՆ
