«Այսօր»․ «Մա՛մ, պա՛պ, մեր համար երեխա ունեցեք». մայրիկին ու հայրիկին այս խոսքերն է միշտ ասել մեր գործընկերը՝ օպերատոր Վահե Կարապետյանը, երբ բանակում էր ու երբ վերադարձել էր բանակից։
44-օրյա պատերազմի ժամանակ, որպես կամավոր, Վահեն, թողնելով աշխատանքը, մեկնեց Արցախ։ Մասնակցել է Մատաղիսի, ապա Շուշիի մարտերին, նոյեմբերի 6-ին Շուշիում ծանր վիրավորում է ստացել, վիրահատվել ու տեղափոխվել Երևանի հիվանդանոցներից մեկը, որտեղ, գիտակցության չգալով, մահացել է նոյեմբերի 9-ին՝ պատերազմի ավարտից մի քանի ժամ առաջ։
2020 թվականի այս օրերին Կարապետյանների տանը սուգ էր, այսօր ճիշտ հակառակն է. ծնողները կատարել են Վահեի ցանկությունը. լույս աշխարհ է եկել Վահե Կարապետյանի եղբայրը՝ Վանը։
Երեխան ծնվել է 2 կգ 470 գրամ քաշով , 46 սմ հասակով։
Կարդացեք նաև
Մայրը՝ Անահիտ Մկրտչյանը, երջանիկ է. կատարել է Վահեի ամենակարևոր նպատակը։
«Ասում էր` մամ՛, պա՛պ, բանակից հետ գամ ու տեսնեմ նորությունն անկողնում պառկած է։ Չէր ասում՝ աղջիկ կամ տղա։ Բանակից եկավ, էլի նույն բառերն էր կրկնում՝ «ինչ կլինի, խնդրում եմ, մեր համար երեխա ունեցեք»…», – պատմում է տիկին Անահիտը։
