«Սահմանադրական բարեփոխումների խորհրդում շատ մեծ մոտիվացիա իրապես գնալ սահմանադրական բարեփոխումների իրականացման, նոր սահմանադրություն գրելուն, չկա։ Առհասարակ տպավորություն է, որ իշխանություններն ուզում են ավելի շատ այն փոփոխությունները, որոնք կարող են արվել ԱԺ-ի կողմից, իսկ դա Սահմանադրության նվազ էական կարգավորումներ են»,- «Գործընկերություն հանուն բաց հասարակության» նախաձեռնության և Անցումային արդարադատության միջազգային կենտրոնի (ICTJ) կողմից հրավիրված «Քաղաքացիական հասարակության հայացքը սահմանադրական բարեփոխումներին» թեմայով հանրային քննարկման ժամանակ նշեց Սահմանադրական բարեփոխումների խորհրդի անդամ, Դանիել Իոաննիսյանը։
Ըստ նրա՝ այս պայմաններում իշխանությունները, վերագրելով անվտանգային խնդիրներին, հանրաքվեի գնալու տրամադրություն չունեն։ Նրա կարծիքով՝ դա նաև անդրադառնում է խորհրդի աշխատանքների վրա․ խորհուրդն աշխատում է դանդաղ և ոչ արդյունավետ։
Դանիել Իոաննիսյանն ասաց՝ պետք չէ հույսը դնել ԱԺ-ի վրա, որ այն լուրջ հակակշիռ լինի գործադիրին, քանի որ գործադիրը ձևավորվում է ազգային ժողովից։ Նա պարզաբանեց․ «Այդ պայմաններում հույս ունենալ, որ ԱԺ-ն լուրջ հակակշիռ կլինի, այդքան էլ պետք չէ։ Առհասարակ իշխանության հակակշռող հիմնական այնպիսի մարմինները, որոնք են դատական համակարգը, ընտրական, հակակոռուպցիոն անկախ մարմինները, երբ այդ մարմինները ձևավորվում են ԱԺ-ի կողմից, այնպես, ինչպես հիմա, ինչպիսի մեխանիզմով էլ դա չնախատեսվի, այդ մարմիններն ընտրվելու են այն անձինք, որոնց առնվազն դեմ չի լինի խորհրդարանական մեծամասնությունը»։
Նա նշեց, որ առաջարկել են ՀՀ նախագահին օժտել առաջնային մանդատով։ Նա մանրամասնեց․ «Նա ընտրվում է ժողովրդի կողմից, չի ընտրվում խորհրդարանի կողմից։ Նախագահն իրական մասնակցություն է ունենում այդ մարմինների ձևավորմանը՝ առաջին հերթին խոսքը դատական համակարգի մասին է, նաև անկախ մարմինների, որոնք պետք է իշխող ուժից, գործադիր իշխանությունից անկախ լինեն։ Դրանք են հակակոռուպցիոն և ընտրական մարմինները։ Որ հանկարծ ռիսկ չառաջանա երկիշխանության, հստակ սահմանվում է, որ գործադիր իշխանության ղեկավարը վարչապետն է։ Այժմ նախագահի վրա եղած որոշ գործառույթները, ըստ մեր առաջարկների՝ հանվում են նախագահի վրայից և տրվում վարչապետին, օրինակ՝ նախարարներ, բարձրաստիճան զինվորականներ նշանակելը»։
Կարդացեք նաև
Տաթև ՀԱՐՈՒԹՅՈՒՆՅԱՆ
