Մարտի 31-ին Մեդիա նախաձեռնությունների կենտրոնն ամփոփեց «ԷներGիտակ» լրագրողական մրցույթի արդյունքները։ Մրցույթի նպատակն էր խրախուսել Հայաստանի էլեկտրաէներգետիկական շուկայի բարեփոխումների մասին որակյալ լուսաբանումը և հանրությանը առավել հասանելի ու մատչելի մատուցումը։
«ԷներGիտակ» լրագրողական մրցույթը կազմակերպվել է Մեդիա նախաձեռնությունների կենտրոնի կողմից Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության ֆինանսավորմամբ։
Լրագրողական նյութերը գնահատելիս մասնագիտական հանձնաժողովը մեծ ուշադրություն է դարձրել մրցույթին ներկայացված աշխատանքների որակին, մասնագիտական չափանիշների պահպանմանը, նյութերի ներկայացման տեխնիկական որակին:
«ԷներGիտակ» մրցույթի ժյուրիի կազմում մասնակցել են մեդիա ոլորտի և էներգետիկայի բնագավառի փորձագետները`
Կարդացեք նաև
- Լիանա Ազիզյան, Հանրային ծառայությունները կարգավորող հանձնաժողով
- Հայկազ Ֆանյան, Սոցիալ տնտեսական ուսումնասիրությունների հայկական կենտրոն
- Հովհաննես Աբրահամյան, Տարածքային կառավարման և ենթակառուցվածքների նախարարություն
- Նարինե Դանեղյան, ԱՄՆ ՄԶԳ Շուկայի ազատականացման և էլեկտրաէներգիայի առևտրի ծրագիր
- Նելլի Ռաֆայելյան, Մեդիա նախաձեռնությունների կենտրոն
- Սարգիս Հարությունյան, Բազմակողմանի տեղեկատվության ինստիտուտ
Ժյուրիի գնահատականների և քննարկումների արդյունքում որոշվեցին հաղթողները:
Հատուկ ռեպորտաժ անվանակարգում մրցանակակիր ճանաչվեց և 250 000 դրամ պարգևի արժանացավ «Հանրային հեռուստաընկերության» լրագրող Մուշեղ Իսախանյանը «Էլեկտրաէներգիայի ազատականացված շուկայում հաշվեկշռման ծառայության անհրաժեշտություն կա» նյութի համար։
Բացատրական նյութ անվանակարգում հաղթող ճանաչվեց և 250 000 դրամ պարգևի արժանացավ «Ամփոփի» լրագրող Գարիկ Հարությունյանը «Հոսանքի ազատ առքուվաճառք. Հայաստանում էլեկտրաէներգիայի ազատականացումը հաստատուն քայլերով մոտենում է սպառողներին» նյութի համար։
Վերլուծական նյութ անվանակարգում հաղթող ճանաչվեց և 250 000 դրամ պարգևի արժանացավ «Հանրային հեռուստաընկերության» լրագրող Հերմինե Բաղդասարյանը «Էլեկտրաէներգիա արտադրող կայանները կսկսեն մրցակցել. էներգետիկ դաշտը ՀՀ-ում ազատականացված է» նյութի համար։
Հիմնական անվանակարգերից բացի մրցույթում ներկայացված էին նաև այլ լրագրողական աշխատանքներ, որոնք ժյուրիի կողմից բարձր գնահատականի էին արժանացել և խրախուսական մրցանակներ ստացել, որոնք աչքի էին ընկել պրոֆեսիոնալ մոտեցմամբ և ներկայացված թեմայի կարևորությամբ:
Խրախուսական 100 000-ական դրամ պարգևների արժանացան Հասմիկ Դիլանյանը (Հանրային ռադիո) «Դաշտն ազատականացված է, ռիսկերը չեզոքացվում են. որտեղի՞ց գտնել հոսանք՝ ցածր գնով» աշխատանքի համար և Քրիստինե Աղալարյանը (Հետք) «Էլեկտրաէներգիայի շուկայի ազատականացում. ովքեր են նոր մատակարարները» նյութի համար։
«ԷներGիտակ» լրագրողական մրցույթն անցկացվել է Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության միջոցով իրականացվող «Շուկայի ազատականացման և էլեկտրաէներգիայի առևտուր» ծրագրի շրջանակում։
Մեդիա նախաձեռնությունների կենտրոն
