«Պաշտոնի եկած եւ ինստիտուցիոնալ հիշողություն ունենալու համար մարդը պետք է խորհրդակցի նախկինների հետ։ Մինչեւ հիմա ինձ մի հայտարարություն է հայտնի, որ 2019թ․-ին ասել եք, որ քննարկել եք Ադրբեջանի նախագահի հետ բանակցային գործընթացի պատմության հետ կապված հարցեր։ Այլ մարդ կա՞ պաշտոնյա, նախկին դիվանագետ, բանակցային գործընթացի մասնակից, որի հետ քննարկվել է ողջ բանակցային գործընթացը»,-ԱԺ արտահերթ նիստում այսօր ՀՀ կառավարության ծրագրի կատարման 2022թ․-ի ընթացքի մասին զեկույցի քննարկման ժամանակ վարչապետ Նիկոլ Փաշինյանին հարցրեց «Հայաստան» խմբակցության պատգամավոր Գեղամ Մանուկյանը՝ նկատի ունենալով այն հանգամանքը, որ արցախյան հիմնախնդրի վերաբերյալ Փաշինյանն ամեն առիթով անում է իրարամերժ, իրականության հետ կապ չունեցող հայտարարություններ։
Նիկոլ Փաշինյանը պատասխանեց․ «Իրականում շնորհակալ եմ հարցի համար։ Խոստովանեմ, որ ճիշտ եք ասում, բայց մի նրբությամբ․ դա իմ մասին չի, մեր մասին է։ Ասեմ ինչի։ Ումի՞ց է անկախացել ԼՂ-ն։ Մեկ ընդհանուր պետություն էինք ուզում, մեկ անկախություն էինք ուզում, մեկ ասում էինք, որ Ղարաբաղը չպետք է լինի Ադրբեջանի կազմում․․․Ինչ վերաբերում է քննարկումներին, ապա ԼՂ իշխանությունն իմ բոլոր քայլերից եղել է տեղյակ։ Նույնիսկ բանակցային փաթեթներն եմ փոխանցել ԼՂ իշխանությանը»։
Փաշինյանը շարունակեց․ «Վերջերս մի պաշտոնյա ասում էր, թե ուզում էր այս կամ այն բանն առաջարկել։ Թող առաջարկեր։ Ավելին՝ հիմա թող գրեն ու հրապարակեն այն, ինչ այն ժամանակ ուզում էին առաջարկել։ Չեն անում, որովհետեւ իրենց գրածը նույն հարցերն է առաջացնելու»։
Ապա Փաշինյանը պնդեց՝ եթե նախկիններն իրեն ասելու բան ունեին, թող գային, ասեին։ Գեղամ Մանուկյանը տեղից բղավեց, որ Վարդան Օսկանյանը պատրաստ է եղել ասել։
Կարդացեք նաև
Փաշինյանն արձագանքեց․ «Ասում եմ՝ Վարդան Օսկանյանն այսօր հրապարակի, թե 2018թ․-ին ինչ խորհուրդ էր տալիս ինձ։ Ես Վարդան Օսկանյանի հետ խնդիր ունեմ, որ ինքն այդ «մադրիդյան սկզբունքներով» ավելի է խորացրել այս շիլաշփոթը»։
Լուիզա ՍՈՒՔԻԱՍՅԱՆ
