Կառավարության շենքի դիմաց այսօրվա բողոքի ցույցի ժամանակ արցախցիները Նիկոլ Փաշինյանի հասցեին վանկարկումներ անելով՝ կոչ արեցին՝ կամ պաշտպանել հայկական շահը, կամ հրաժարական տալ։
«Շուշի հայրենակցական միություն» շարժման նախագահ Աշոտ Հարությունյանն ասաց․ «Ժողովրդի կողմից կառավարության վրա ճնշում պետք է գործադրվի։ Եթե այս կառավարությունը ոչ մի բան չի անում, ուրեմն ինքը պետք է հրաժարական տա եւ իշխանությունը տա այն մարդկանց, որոնք վճռականությամբ լի են՝ լուծելու այս հարցերը։ Կոնկրետ ես նկատի ունեմ զինվորականությանը, որոնք կարող են այս հարցերը լուծել»։
«Հանուն Հադրութի» հասարակական նախագահ Լեւոն Հայրյանի խոսքով՝ այսօրվա հավաքի ժամանակ արցախցիները ոչ թե սոցիալ-տնտեսական հարցեր են հնչեցնում, այլ քաղաքական։ «Հայաստանի իշխանություններին մեր պահանջը կարճ ու լակոնիկ է եւ իրենց համար հասկանալի պետք է լինի։ Նրանք կամ պետք է տեր կանգնեն հայ ազգի ազգային շահերին եւ գնան այդ շահերից բխող պահանջների կատարմանը, կամ հրաժարական տան։ Չի կարելի սեփական հարմարավետության կամ քաղաքական նկատառումներից ելնելով՝ ժողովրդին այս վիճակի մեջ պահել։ Երկու տարի առաջ ես ասում էի՝ եթե ձեր ապագան դեռ չգիտեք, ժողովուրդ ջան, նայեք Հադրութին եւ տեսեք ձեր ապագան։ Ժողովուրդը թերահավատ էր վերաբերվում։ Հիմա, ցավոք սրտի, կարող ենք ավելացնել, որ եթե Հադրութին նայելով՝ ձեր ապագան չեք տեսել, նայեք Ջերմուկին, կտեսնեք»։
Հայրյանը հավելեց․ «Մեր կառավարությունն ամեն ինչ անում է ազգային, պետական շահերի հարցերը լուծելուց խուսափելու համար։ Ապացուցելու կարիք չկա, ասում է՝ սահմանը պետք է ռուսը պահի, Արցախում ռուսն է պատասխանատու, Լաչինի միջանցքի պատասխանատուն ռուսն է։ Ինչի՞ համար է Հայաստանի իշխանությունը, չենք հասկանում։ Եթե մեր իշխանություններին թվում է, թե հայ մարդու իրավունքները պիտի պահի ռուս խաղաղապահը, ո՞նց հասկանանք։ Հայաստանի իշխանությունը հստակ պատասխանատու է Ալյասկայից մինչեւ Ավստրալիա ապրող ցանկացած հայի համար, որովհետեւ հայտարարել է, որ Հայաստանի ու հայ ազգի իշխանությունն է»։
Կարդացեք նաև
Ռոզա ՀՈՎՀԱՆՆԻՍՅԱՆ
