Այսօր՝ մայիսի 31-ին, Ժողովրդավարության հայկական ֆորումի շրջանակներում տեղի ունեցավ պանելային քննարկում «Անկախ լրատվամիջոցների հզորացման կարևորությունը ապատեղեկատվության դեմ պայքարում» թեմայով:
Պանելային քննարկմանը մասնակցում էին ՀՀ ԱԺ պատգամավոր Լիլիթ Մինասյանը, Խոսքի ազատության պաշտպանության կոմիտեի նախագահ Աշոտ Մելիքյանը, քաղաքական հաղորդակցության փորձագետ Կարինա Ավետիսյանը, «Սիվիլնեթի» փաստերի ստուգման հարթակ Civilnetcheck-ի բաժնի ղեկավար Անի Գրիգորյանը:
Քննարկման մասնակիցներն անդրադարձան լրատվամիջոցների հեղինակության և հանրային վստահության խնդրին։
«Մի հետազոտության համաձայն՝ բնակչության 98 տոկոսը չի վստահում լրատվամիջոցներին: Սա մի կողմից աղետալի ցուցանիշ է: Սակայն մյուս կողմից էլ լավ է, որ այդ վստահությունը չկա ապատեղեկատվության նկատմամբ․ այն ինֆորմացիոն հոսքը, որ գալիս և հասնում է լսարանին շատ մեծ վերապահումով է ընդունվում», – ասել է Մելիքյանը։
Կարդացեք նաև
Նա նշել է, որ հայաստանյան լրատվամիջոցների ճնշող մեծամասնությունը խիստ բևեռացված է, բաժանված քաղաքական ճամբարների։
«Լրատվամիջոցները քաղաքական համակարգի մաս են կազմում, և առաջին հերթին սպասարկում են քաղաքական շահերը, իրենց քաղաքական և ֆինանսական հովանավորների շահերը և երկրորդ հերթին միայն հանրային շահն են սպասարկում», – ասել է Մելիքյանը։
Անդրադառնալով հանրության մեդիագրագիտության խնդրին, Անի Գրիգորյանը նշել է, որ դրա բացակայությունը պարարտ հող է ստեղծում ապատեղեկատվության և կեղծ լուրերի տարածման համար։
«Սոցցանցերը և համացանցը փոխել են խաղի կանոնները և կեղծ լուրերը շատ ավելի արագ են տարածվում, ավելի շատ մարդկանց են հասնում: Սակայն մյուս կողմից պետական մարմիններն ընդհանրապես ճկուն չեն: Ընդհանրապես պատշաճ ձևով չեն իրականացնում համագործակցությունը լրատվամիջոցների հետ, ստեղծվում է ինֆորմացիոն վակում, որը լցվում է դավադրության տեսություններով և կեղծ լուրերով», – ասել է Գրիգորյանը։
Պետական մարմինների հաղորդակցության խնդիրներին է անդրադարձել նաև Լիլիթ Մինասյանը։
«Պետք է մեխանզիմներ կառուցել, որ լրատվամիջոցներն ավելի սերտ համագործակցեն, ինչ-որ կառուցակազմ ստեղծել, որ հրատապ, այրվող լուրերի դեպքում հնարավորություն չտրվի 30-օրյա վերլուծական աշխատանք կատարել», – ասել է Մինասյանը։
Քաղաքական հաղորդակցության փորձագետ Կարինա Ավետիսյանը նշել է, որ ապատեղեկատվությունն ավելի ու ավելի մեծ ճնշում է գործադրում աշխարհի ժողովրդավարական երկրների հասարակական կյանքի վրա:
«Նրանք, ովքեր ապատեղեկատվություն են տարածում նպատակ ունեն խաթարելու մարդկանց վստահությունը ճշմարտություն պահպանող ինստիտուտների նկատմամբ: Եթե դա նրանց հաջողվի, ապա ճշմարտությունը և ժողովրդավարությունը վտանգված կլինեն», – ասել է Ավետիսյանը։
Քննարկումը վարում էր «Ֆակտոր» տեղեկատվական կենտրոն ՀԿ նախագահ Արևիկ Սահակյանը:
Իրազեկ քաղաքացիների միավորում
