«Գեղարքունիքի մարզի 5 խոշորացված համայնքների բոլոր բնակավայրերի կոյուղաջրերը, որոնք հիմա թափվում են Սեւան, պետք է կենսաբանական մաքրման ենթարկվեն, նոր թափվեն»,- այսօր Ազգային ժողովում 2022 թվականի պետական բյուջեի կատարողականի քննարկման ժամանակ ասաց Շրջակա միջավայրի նախարար Հակոբ Սիմիդյանը։ Նա նշեց, որ խոսքը բավական ծախսատար սարքերի ու ենթակառուցվածքների մասին է։
«Այս պահին մենք Գավառում մեխանիկական կայանի վերականգնման գործընթացն ենք իրականացնում, բայց սա էլ մեր ամենաարդյունավետ կետը չէ։ Ամենաարդյունավետ կետը կենսաբանական կայաններ հիմնելն է։ Այս ուղղությամբ մենք աշխատում ենք նաեւ մեր միջազգային գործընկերների հետ։ Նաեւ մեր բյուջետային կարողությունների շրջանակներում ենք փորձում խնդիրը լուծել։ Այո, Սեւան թափվող կոյուղաջրերը պետք է մաքրվեն, նոր ուղղվեն Սեւան։ Սա մեր վերջնական թիրախն է»,- ասաց նա։
Ըստ Սիմիդյանի՝ Սեւանա լճում վտանգավոր նյութերի հայտնվելը, այդ թվում՝ գյուղատնտեսական աշխատանքների շրջանակներում, նույնպես պետք է բացառել։ Նա ասաց, որ այդ ուղղությամբ պետք է գյուղացիների հետ աշխատանք տարվի, որ գյուղատնտեսության այլ ճյուղերը զարգացնեն։ «Օրինակ՝ անասնապահությունը, որը կարող է ճնշում ունենալ Սեւանի վրա, պետք է փոխարինենք այլ գործիքակազմով։ Այս ուղղությամբ ծրագրեր ունենք»,- հավելեց նա։
Ռոզա ՀՈՎՀԱՆՆԻՍՅԱՆ