«Ապրելու երկիր» կուսակցությունը օրերս Վարչական դատարան ներկայացրեց հայց՝ ընդդեմ կառավարության՝ Երևան համայնքի ավագանու լիազորությունների ժամկետը չկրճատելու և ավագանու արտահերթ ընտրություններ չնշանակելու անգործությունը ոչ իրավաչափ ճանաչելու պահանջով: Ըստ կուսակցության, կառավարությունը պարտավոր է նշանակել ավագանու արտահերթ ընտրություններ։
Այսօր լրագրողների հետ ճեպազրույցում կուսակցության համահիմնադիր Մեսրոպ Առաքելյանն այս առնչությամբ ասաց. «Այս պահին դատարանի կողմից հայցն ուղարկվել է լրամշակման: Դատավորը նշանակվել է, առաջիկա մեկ-երկու օրերին կներկայացնենք լրամշակումը: Հիմնավորում են ուզում, կներկայացնենք, որից հետո կնշանակվի առաջին դատական նիստը»:
Անդրադառնալով սպասվող ընտրություններին՝ Մեսրոպ Առաքելյանը հույս հայտնեց, որ 2021-ի նման չի լինի, երբ հասարակությունը ստիպված էր երկու բեւեռներից ընտրել մեկին, ինչ է թե մյուսը չընտրվի. «Հույս ունենք, որ այս ընտրություններին ընտրապայքարը կգնա դրականին ուղղված, որպեսզի հասարակությունն ընտրի հանուն Երեւանի եւ ոչ թե հանուն նրա, որ ուժերից ինչ-որ մեկը չլինի»:
Դիտարկմանը, որ կարծես ընտրապայքարը թեժ չի լինելու՝ Մեսրոպ Սռաքելյանն արձագանքեց. «Մենք խոսում ենք մեր մասնակցության մասին եւ գնում ենք հաղթելու եւ այդքանով վստահ ենք, որ պայքարը բավականին թեժ է լինելու»:
Կարդացեք նաև
Թե ով է գլխավորելու «Ապրելու երկրի» ցուցակը՝ ի՞նքը, թե՞ Մանե Թանդիլյանը՝ Մեսրոպ Առաքելյանը պատասխանեց. «Մեծ գաղտնիք չի լինի, առաջիկայում կներկայացնենք»:
Մեսրոպ Առաքելյանը նաեւ ասաց, որ Երեւանի ընտրություններում հաղթելուց հետո արդեն իշխանափոխության օրակարգը ավելի առարկայական կդառնա իրենց համար:
Հռիփսիմե ՋԵԲԵՋՅԱՆ
