Տավուշի մարզի Իջևան քաղաքում օրեցօր մեծանում է թափառող շների խնդիրը: Վերջին ամիսներին արձանագրվել են շների հարձակման բազմաթիվ դեպքեր ոչ միայն մեծահասակաների նկատմամբ, այլև մանկահասակ երեխաների: Անգամ քաղաքի կենտրոնական փողոցներում շները շրջում են ոհմակով, հաճախակի հայտնվելով նաև դպրոցների և մանկապարտեզների շրջակայքում:
Իջևանի համայնքապետ Արթուր Ճաղարյանից Aravot.am-ը հետաքրքրվեց, թե ինչպես են պատրաստվում պայքարել թափառող շների դեմ: «Իհարկե խնդրին քաջատեղյակ ենք, բնակիչների ահազանգերն էլ բազմաթիվ են: Իջևանի համայնքապետարանը արդեն իսկ պայմանագիր է կնքել շների խնամքի կենտրոններից մեկի հետ, որը պետք է զբաղվի այդ հարցով: Մեր նպատակը ոչ թե շների մասսայական քնեցումն է, այլ կենդանիների բուժումն ու ստերջացումը: Հունիսի 5-ից արդեն իսկ ընթանում է շների հավաքագրումը: Համապատասխան հետազոտություններից հետո` անհրաժեշտության դեպքում հիվանդ շները կստանան համապատասխան բուժում, որից հետո կրկին բաց կթողնվեն համայնքի տարածքում: Այս աշխատանքների ընթացքում հետևողական ենք, որ որևէ շուն չվնասվի: Շները ենթարկվելու են միայն բուժման և ստերջացման: Ինչպես գիտեք, ստերջացված շունը չի ունենում ձագեր, չի կազմում ոհմակ, ինչն այսօր այնքան անհանգստացնում է մեր քաղաքացիներին»,- հավելեց Ճաղարյանը:
Լիա ճԱՂԱՐՅԱՆ