«Մտավորական ո՞ւմ եք համարում, մտավորականներն այսօր այստեղ են բոլորը»,- այսօր ԿԸՀ շենքի մոտ լրագրողների հետ զրույցում ասաց դերասան Հրանտ Թոխատյանը։ Անդրադառնալով հարցին, թե ինչո՞ւ են մտավորականները պասիվ եւ հասարակությանը համախմբման կոչեր չեն անում, Թոխատյանը հավելեց․ «Ուրեմն այդպես են ապրում, այդպես են կարծում, այդպես են ստեղծագործում եւ դա են փորձում մատուցել մեր ժողովրդին, դրա համար մեր վիճակն այս է»։
Հարցին, թե բեկումը ե՞րբ կլինի, Հրանտ Թոխատյանը պատասխանեց․ «Հենց հիմա արդեն բեկումն սկսվեց, որովհետեւ մարդկանց մտազբաղության մեջ մտավ «Հայաքվեի» ամենակարեւոր պատճառը։ Հասկացան, որ առաջին անգամ իրենք իրենց ձեռքով կարող են օրենք մտցնել Ազգային ժողով, օրենք ընդունել տալ՝ ըստ ժողովրդի իղձի ու ցանկության։ Դա շատ կարեւոր է, մենք երբեք նման բան չենք ունեցել»։ Թոխատյանը նշեց, որ իրենից կախված ամեն ինչ անելու է, որ հասարակությունը համախմբվի ու միանա «Հայաքվեի» ստորագրահավաքին։
Հարցին, թե իշխանության ծրագրերը կարո՞ղ է խաթարել հասարակությունը, ստիպել իշխանություններին՝ հետ կանգնել իրենց քայլերից, Թոխատյանը պատասխանեց․ «Ես չեմ սիրում որեւէ բան անել ստիպողաբար, ես դեռ հույս ունեմ մարդու բանականության վրա, եթե բացատրենք, իրենք էլ պետք է հասկանան, որ սա ի օգուտ մեր երկրի, մեր պետականության ու պետության է։ Զոռով, թաթիկին խփելով՝ ոչնչի չես հասնի, բացատրելով, քաղցր խոսքով պետք է ասես, որ պետք է անել այս քայլը»։
Կարդացեք նաև
Ռոզա ՀՈՎՀԱՆՆԻՍՅԱՆ
