Հունիսի 26-ին կայացել է Իջևան համայնքի ավագանու արտահերթ նիստը: Օրակարգի հարցերը վերաբերում էին Իջևան համայնքի վարչական տարածքում գտնվող հողամասերի նշանակության փոփոխությանը, ինքնակամ շինությունների և ինքնակամ օգտագործվող հողամասերի իրավական կարգավիճակը որոշելուն, համայնքի վարչական և ֆոնդային բյուջեներում փոփոխություն կատարելուն:
Համայնքի ավագանին որոշում կայացրեց նաև աջակցել «Հույսի կամուրջ» ՀԿ-ի Իջևանի մասնաճյուղին` հենաշարժողական խնդիրներ ունեցող երեխաներին ֆիզիկական վերականգնողական և օկուպացիոն թերապիաներից օգտվելու հնարավորություն ստանալու համար: «Հույսի կամուրջ» ՀԿ-ի Իջևանի մասնաճյուղի ներկայացուցիչն ավագանու անդամներին տեղեկացրեց, որ Իջևան համայնքի քաղաքային և գյուղական բնակավայրերի 111 երեխա ճանապարհածախսի պատճառով զրկված է վերականգնողական թերապիաներ ստանալու հնարավորությունից: Ավագանու որոշմամբ` համայնքի բյուջեից 500. 000 դրամ հատկացվեց երեխաների տեղափոխման խնդիրները լուծելու համար:
Լիա ՃԱՂԱՐՅԱՆ
