«Քաշաթաղի միջանցքի ապաշրջափակման ժողովրդական շարժման շտաբը» այսօր երեկոյան քննարկելու է, թե ինչ պետք է անել ստեղծված իրավիճակում, երբ ՌԴ խաղաղապահ զորախմբի հրամանատարությունը մերժել է դեպի Հակարիի կամուրջ իրենց ավտոերթն ուղեկցելու դիմումը։
Ավելի վաղ տեղեկացրել էինք, որ Արցախում պատրաստվում են խաղաղ երթ իրականացնել դեպի Հակարիի կամուրջ՝ Բերձորի միջանցքի բացման եւ ադրբեջանական ապօրինի անցակետի ապամոնտաժման պահանջով։ «Միջանցքի ապաշրջափակման ժողովրդական շարժման շտաբի» նախաձեռնող խմբի անդամները օգոստոսի 5-ին նամակ էին հղել խաղաղապահ զորակազմի հրամանատարությանը՝ կոչ անելով հերքել կամ հաստատել ադրբեջանական տելեգրամ ալիքներից մեկում հրապարակված լուրը, որ իբրեւ թե ռուս խաղաղապահներն արցախցիների խաղաղ ցույցի պատրվակով փորձում են Լաչինի միջանցքում գործողություն իրականացնել։
Ինչպես նաեւ նամակով արցախցիները դիմել էին ռուս խաղաղապահներին՝ խնդրելով ուղեկցել իրենց ավտոերթը դեպի Հակարիի կամուրջ։ Սակայն պատասխան նամակում խաղաղապահ զորակազմի հրամանատարի տեղակալ Սազոնովը նախաձեռնության անդամներին այսօր գրավոր պատասխանել է, որ նոյեմբերի 9-ի հայտարարությունը չի նախատեսում ավտոերթերի ուղեկցումը, ինչպես նաև տարբեր ակցիաների և հանրահավաքների անվտանգության ապահովումը։
«Միջանցքի ապաշրջափակման ժողովրդական շարժման շտաբի» նախաձեռնող խմբի անդամ Գագիկ Ավանեսյանը «Առավոտի» հետ զրույցում ասաց, որ արցախցիներն իրենց հետագա քայլերը քննարկելու են այսօր երեկոյան։ «Բայց փաստն այն է, որ սրանով արձանագրվեց, որ ռուս խաղաղապահներն իրենց պարտականությունները չեն կատարում եւ հրաժարվում են նաեւ կատարել ապագայում»,- ասաց Գագիկ Ավանեսյանը։
Կարդացեք նաև
Անդրադառնալով ռուս խաղաղապահների հրամանատարության այն պատասխանին, թե նոյեմբերի 9-ի հայտարարությունը չի նախատեսում ավտոերթի ուղեկցումը, ինչպես նաև տարբեր ակցիաների և հանրահավաքների անվտանգության ապահովումը, Ավանեսյանն ասաց, որ իրենք պարտավորություն ունեն Բերձորի միջանցքը բաց պահել։ «Մենք մինիմալն ենք պահանջել նրանցից, որ գոնե մի շարասյուն ուղեկցեն։ Իրենք պատասխանում են, որ նման պարտավորություն չկա։ Դա նույն քաղաքականության շարունակությունն է, եւ մեզ համար հասկանալի է, որ ցանկություն չունեն իրենց պարտականությունները կատարելու։ Մեզ հետ հանդիպման ժամանակ ավելի վաղ Լենցովը պարզ ասել է՝ ես զինվորական մարդ եմ, հրաման եմ կատարում, ինչ հրաման լինի, դա էլ կատարելու եմ։ Ուստի, իրենք հրաման չունեն մեր շարասյուն ուղեկցելու, հրաման ունեն միջանցքը փակ պահելու, դա իմ անձնական կարծիքն է»,- նշեց Գագիկ Ավանեսյանը։
Ռոզա ՀՈՎՀԱՆՆԻՍՅԱՆ
