Շիրակի մարզի Անի խոշորացված համայնքի Բագրավան գյուղում տեղի է ունեցել նշանադրություն․ գյուղի ընտանիքներից մեկը, որն այս օրերին իր տանն է հյուրընկալել Արցախից բռնի տեղահանված 15 հոգանոց բազմանդամ ընտանիքի, որդու համար հարսնացու է ընտրել հյուրընկալված ընտանիքից։
Հարսնացուն 22 տարեկան է, փեսացուն՝ 26։
Նորապսակներին շնորհավորելու համար այսօր նրանց էր հյուրընկալվել «Շիրակ կենտրոն» ՀԿ նախագահ Վահան Թումասյանը, որն այս օրերին զբաղված է Արցախից բռնի տեղահանված ընտանիքների հոգսերը թեթևացնելով։
Նա իր ֆեյսբուքյան էջում Արցախից բռնի տեղահանված գերդաստանից լուսանկար է հրապարակել՝ գրելով, որ եկել է աչքալուսանքի․ նոր ընտանիք է ձևավորվում։
Կարդացեք նաև
Վահան Թումասյանն Անի պատմական մայրաքաղաքի ավերակներից ոչ հեռու գտնվող Բագրավանը դարձրել է Շիրակի մարզի զբոսաշրջային ամենահետաքրքիր տեղանքներից մեկը՝ այնտեղ կոլորիտային իջևանատուն-թանգարան հիմնելով։
Բագրավանի վարչական մաս է կազմում Անի պատմական մայրաքաղաքի ավերակներից ընդամենը մեկ ձորով բաժանված Նորաշենը՝ Խարկով գյուղը։
Վահան Թումասյանն Aravot.am-ին ասաց, որ սա առաջին նմանատիպ նշանադրությունն է Հայաստանում․ Արցախից բռնի տեղահանված ընտանիքը շուտով կտեղափոխվի գյուղական մի փոքրիկ տուն՝ բնակության։
Մեր զրուցակիցը վստահ է, որ գյուղում նոր ընտանիքներ ևս կկազմվեն․ Արցախից հետաքրքրիր երիտասարդներ են Բագրավան տեղափոխվել։
Նունե ԱՐԵՎՇԱՏՅԱՆ
