«Վենետիկը և հայերը» նախագծի շրջանակում Վենետիկի Կա’Ֆոսկարի համալսարանում օրերս տեղի ունեցավ գյումրեցի նկարիչ Տարոն Մանուկյանի «Ներդաշնակ բնություն» որմնանկարի բացումը: «Տարոն Մանուկյանի հետ առաջին համագործակցությունն ունեցել ենք 2016 թ., երբ Գյումրիի նկարիչներին նվիրված զեկույցի վերջում տեսակապ հաստատեցինք Գյումրիի Նկարիչների միության նախագահ, Գեղարվեստի ակադեմիայի պրոֆեսոր Գագիկ Մանուկյանի և երիտասարդ նկարիչ, Գյումրիում Street Art ժանրի հիմնադիր Տարոն Մանուկյանի հետ, որոնք պատասխանեցին ներկաների հարցերին:
Նկարչի հետ եւս մեկ համագործակցություն ունեցա Բրյուսելում Դանթե Ալիգիերիի «Աստվածային կատակերգության» թարգմանություններին նվիրված ցուցահանդեսի շրջանակում, երբ որոշվեց ցուցահանդեսին ներկայացված դանթեական տողերի արևելահայ նմուշը զետեղել «Glitch art» կոչվող գերժամանակակից ֆոնի վրա` խորհրդանշելու, որ Դանթեն արդիական է նաև այսօր»,- նշեց «Վենետիկը և հայերը» նախագծի գիտական ղեկավար, Վենետիկի Կա’Ֆոսկարի համալսարանի պրոֆեսոր Սոնա Հարությունյանը:
«Վենետիկը և հայերը» նախագծի առաջին միջոցառումը տեղի էր ունեցել մայիս ամսին, երբ Վենետիկի Սանտա Մարտա թատրոնում ներկայացվեց Կոստան Զարյանի «Վենետիկյան նորավեպ» ստեղծագործության թատերական բեմադրությունը: Երկրորդ միջոցառումը տեղի ունեցավ համալսարանի ակադեմիական սենատի «Berengo» սրահում, որտեղ իրականացվեց գործարար համաժողով իտալացի և հայ գործարարների մասնակցությամբ:
Կարդացեք նաև
«Հայաստանի Հանրապետության Անկախության 32-րդ տարեդարձին նվիրված հայ-իտալական գործարար համաժողովը, ցավոք, համընկավ ողբերգական իրադարձությունների հետ։ Լեռնային Ղարաբաղի պաշարումից ավելի քան ինը ամիս անց էթնիկ զտման նպատակով Ադրբեջանը լայնամասշտաբ ագրեսիա ձեռնարկեց, որն ունեցավ ողբերգական բեկում` պատճառ դառնալով շուրջ 120000 հայերի զանգվածային արտագաղթի իրենց պապենական հողերից՝ Արցախից: Տարոն Մանուկյանի «Ներդաշնակ բնություն» որմնանկարն արվեստագետի ձայնն է ընդդեմ մոլորակի աղտոտվածության` թե՛ ուղիղ և թե՛ փոխաբերական իմաստով»,-ընդգծեց պրոֆեսոր Սոնա Հարությունյանը:
Հավելենք, որ «Հայերը և Վենետիկը» նախագծի եզրափակիչ միջոցառմանը մասնակցել են նաեւ Վենետիկում ՀՀ պատվո հյուպատոս Գագիկ Սարուխանյանը, ճարտարապետ Արա Զարյանը, իտալացի արվեստագետներ, Վենետիկի համալսարանի դասախոսներ և ուսանողներ:
