ԱԺ նիստում «Պետական տուրքի մասին» օրենքում փոփոխություններ ու լրացումներ կատարելու նախագծի քննարկման ժամանակ ՔՊ խմբակցության պատգամավոր Արթուր Հովհաննիսյանն արձագանքեց «Հայաստան» խմբակցության պատգամավոր Արծվիկ Մինասյանի ելույթին։
Կառավարությունն օրենսդրական փոփոխություններ է առաջարկում, ըստ որի՝ Գյումրիի մաքսատանը կից կայանատեղիում չմաքսազերծված ավտոմեքենաների կայանման մեկ օրվա արժեքը ներկայիս 1600 դրամի փոխարեն առաջարկվում է սահմանել 5000 դրամ։ Արծվիկ Մինասյանը հայտարարեց, որ այստեղ «կոռուպցիա էլ կա, հովանավորչություն էլ կա, եւ թաքնված բիզնես է ստեղծվում որոշ պաշտոնյաների համար»։
«Նախ, պարոն Մինասյան ջան, մեզ ձեր արշինով մի չափեք, սա էն թվերը չէ, որ օրենքներ բերենք, պաշտոնյաների համար բիզնեսներ ստեղծենք, պետությունը թալանենք»,- ասաց Արթուր Հովհաննիսյանը։
Արծվիկ Մինասյանն ի պատասխան ասաց․ «Այս ամբիոնը դարձել է ժուռնալիստիկայի ամենավատ սցենարով գնացող հայտարարությունների ամբիոն։ Ամենայն պատասխանատվությամբ հիմա այստեղից հայտարարում եմ՝ պարոն Հովհաննիսյան, բերեք մեկ օրինակ, երբ դուք այստեղից անպատասխանատու ձեւով ասում եք՝ ձեր արշինով մի չափեք։ Բերեք մեկ օրինակ, որ ես՝ Արծվիկ Մինասյանս, որպես պատգամավոր, որպես կառավարության անդամ, երբեւէ մի նախագիծ եմ բերել որեւէ անձի բիզնես շահերը սպասարկելու համար։ Հակառակ դեպքում, ակնկալում եմ ներողություն ձեր այդ խոսքի համար։ Երբ որ կոնկրետ հարցադրումները դնում ենք, փոխանակ դուք էլ շահագրգիռ լինեք այդ հարցադրումները խորացնելու ու առաջ տանելու, հելել եք այստեղից հերթական հայտարարությունն եք անում անպատասխանատու ձեւով։ Լավ, ինչքա՞ն կարելի է»։
Կարդացեք նաև
ՔՊ խմբակցության ղեկավար Հայկ Կոնջորյանը, դիմելով Արծվիկ Մինասյանին, ասաց․ «Երբ որ դուք քաղաքական բնույթի մեղադրանքներ եք հնչեցնում, որ պաշտոնյաների համար բիզնես ենք ստեղծում, ես էլ կարող եմ ենթադրություններ հնչեցնել, որոնք իրենց բնույթով կլինեն ավելի շատ պնդումներ, քան ենթադրություններ»։
Ռոզա ՀՈՎՀԱՆՆԻՍՅԱՆ
