«Այստեղ մեկ խորքային խնդիր կա՝ եթե այս նախագիծը մենք ընդունեինք նախկինում կամ այնպիսի իրավիճակում, որում հայտնված չէր լինի ՀՀ-ն, միգուցե ընդունելի լիներ։ Բայց ՀՀ՝ այս վիճակում գտնվելը, ես նկատի ունեմ ռազմաքաղաքական իրավիճակը, պատերազմի վերսկսման հնարավոր տարբերակները, հնարավորություն է տալիս, որպեսզի մենք այլ որոշումներ ընդունենք, որպեսզի ավելի խստացված լինեն զինվորական ծառայության վերաբերյալ մեր պատկերացումները»,- ԱԺ արտահերթ նստաշրջանում ՔՊ խմբակցության պատգամավոր Հայկ Սարգսյանի հեղինակած «Զինվորական ծառայության եւ զինծառայողի կարգավիճակի մասին» օրենքում լրացումներ եւ փոփոխություն կատարելու մասին նախագծի քննարկման ժամանակ ասաց «Հայաստան» խմբակցության պատգամավոր Սեյրան Օհանյանը։
Նրա խոսքով՝ զինվորական ծառայությունը պարտականությունից բացի, պետք է նաեւ առաքելություն լինի եւ ապահովի հավասար պայմաններ բոլորի համար։ «Նախկինում մենք ընդունեցինք որոշում վիճակահանության վերաբերյալ, որպեսզի այդ հավասար պայմանները լինեն։ Բացի դրանից, բանակում կան հանձնաժողովներ, որոնք ընտրություն են կատարում ըստ մասնագիտական իրենք կարողությունների։ Դրանով նաեւ որոշվում է ինտելեկտուալ այն խնդիրը, որի մասին այսօր խոսում ենք։ Ես կարծում եմ, որ այս նախագիծը որոշակի ժամանակավրեպություն ունի։ Առաջինից երկրորդ ընթերցումը մենք ձեռնպահ կմնանք, իսկ այդ ընթացքում կքննարկենք եւ կգանք որեւիցե եզրակացության»,- ասաց Օհանյանը։
Ռոզա ՀՈՎՀԱՆՆԻՍՅԱՆ
