Ինչպես հայտնել ենք, Հեռուստատեսության եւ ռադիոյի հանձնաժողովն այսօր որոշում կայացրեց կասեցնել «Սպուտնիկ Արմենիայի» վերահեռարձակմամբ «Տոսպա» ռադիոընկերության հեռարձակումը առավելագույն ժամկետով՝ 30 օրով:
Ըստ ՀՌՀ-ի արձանագրության, «Սպուտնիկ Արմենիան», վերահեռարձակելով «Ուրբաթը Տիգրան Քեոսայանի հետ» հաղորդումը, օրենքով արգելված բռնության կոչեր է տարածել:
Բացի այդ, ՀՌՀ-ն նաեւ որոշեց 500 հազար դրամով տուգանել ընկերությանը: Հանձնաժողովը գտնում է, որ հեռարձակողի կողմից «Աբովյան թայմ» հաղորդման հեռարձակման ընթացքում հնչեցվել են այնպիսի կարծիքներ, որոնք ոչ միայն չեն համապատասխանում իրականությանը, այլ հայ ժողովրդի շրջանում առերեւույթ խուճապ են առաջացնում։ Արձանագրվել է նաև, որ հաղորդման ընթացքում հնչեցվել են ոչ հավաստի կամ հավաստիության բավարար չափ չունեցող, չստուգված աղբյուրներից սնվող տեղեկություններ:
«Աբովյան թայմի» հաղորդավարն ասել է՝ «Եթե առաջ կոնցեպտ էր Ղարաբաղը տանք, հանգիստ ապրենք, հիմա՝ Սյունիքը տանք հանգիստ ապրենք, Տավուշը տանք, հանգիստ ապրենք»: ՀՌՀ-ի գրությանն ի պատասխան՝ հաղորդավարն ասել է, որ դա իր սուբյեկտիվ կարծիքն է, սակայն ՀՌՀ-ն գտնում է, որ դա օրենքի խախտում է, պետք է հավաստի տեղեկություններ հայտնել, հաղորդավարը բարձր պատասխանատվության շեմ ունի:
Կարդացեք նաև
Ընկերության շահերը ներկայացնող փաստաբան Սիմոն Ֆարմանյանն ասաց, որ ուղիղ եթեր է եղել, բացի այդ, դա հանրային քննարկման թեմա է, փաստական տվյալ չկա, հանրային խոսույթում կա՝ Ղարաբաղը տանք, պրծնենք, Սյունիքը տանք՝ պրծնենք. «Եթե այս նախադեպը լինի, մեր մոտ կլինի գրաքննություն: Հաղորդավարը ուղիղ եթերում է ասել, չէր կարող վերահսկվել, հիմա կարող է հաղորդավարը եթերի ժամանակ գլուխը թրաշեր»: Հանձնաժողովից ասացին՝ ռադիոյի դեպքում դա թույլատրելի է, չի երեւում ինչ է անում:
Հանձնաժողովի անդամ Արթուր Մանուկյանի խոսքով՝ «Իմ հարազատ եղբայրը որն ինձնից 4 տարի փոքր է, հիմա Սյունիքի սարերում է՝ սահմանի վրա, երբ որ ես լսում եմ ռադիոյով՝ Սյունիքը կտան, կպրծնեն, իմ մոտ ստացվում է փչացած օր: Ոչ թե ազատ խոսքի մասին է, այլ բրախած խոսքի մասին է այստեղ»:
Տիգրան Հակոբյանն ասաց, որ Քեոսայանին չեն կարող համեմատել Աբովյանի հետ, «մեր Արմանն է», մեր քաղաքացին է, ուստի կարող են այս դեպքում զուտ տուգանք կիրառել. «500 հազար, «Տոսպան» ահագին փող է աշխատում «Սպուտնիկից», մեզ հետ թող կիսվի, պետության բյուջեի հետ էլ»:
Հռիփսիմե ՋԵԲԵՋՅԱՆ
Հ․ Գ․ Պատրաստ եմ իշխանության յուրաքանչյուր ներկայացուցչի հետ բանավիճել այն մասին, ինչ անվանում եք «չճշտված տեղեկություն». ասել է Արման Աբովյանը` իր հաղորդման վերաբերյալ ՀՌՀ որոշման մասին․ «Ծիծաղելի է. խուճապ տարածող են համարել հաղորդումը, երբ հաղորդման մեջ վերլուծության են ենթարկվել իշխանությունների խոսքերը»։
