Aravot.am-ը ԿԳՄՍ նախարար Ժաննա Անդրեասյանի անունով գրավոր հարցում էր ուղարկել: Հետաքրքրվել էինք՝ ինչու է ԿԳՄՍ նախարարությունը դատի տվել «Ակունք» ազգագրական երգի-պարի համույթին, ի՞նչ է նախարարությունը պահանջում «Ակունքից»: Նշենք, որ ԿԳՄՍ նախարարությունը համույթից պահանջում է վերադարձնել 2 մլն 283 հազար դրամ դրամաշնորհը, քանի որ, ըստ նախարարության տեսակետի՝ դրամաշնորհով իրականացված ծրագիրը թերի է կատարվել։
«Ակունքին» վերաբերող հարցին նախարարությունից ստացվել է հետեւյալ գրավոր պատասխանը. «ՀՀ մշակույթի նախարարության (ներկայում իրավահաջորդ՝ ՀՀ կրթության, գիտության, մշակույթի և սպորտի նախարարություն) եւ «Ակունք ազգագրական համույթ» ՀԿ-ի միջև կնքված դրամաշնորհի հատկացման պայմանագրի կատարման շրջանակում «Ակունք ազգագրական համույթ» ՀԿ-ի կողմից ներկայացված ֆինանսական հաշվետվությունների ուսումնասիրման արդյունքում պարզ է դարձել, որ առկա են շեղումներ: Այդ իսկ պատճառով ՀՀ ԿԳՄՍ նախարարությունը դիմել է դատարան՝ գումարի բռնագանձման պահանջով՝ պայմանագրային պարտավորությունները (ֆինանսական հաշվետվությունների ներկայացման մասով) ոչ պատշաճ կատարելու հիմքով»:
Գոհար ՀԱԿՈԲՅԱՆ
