Երեկ Գյումրու Շիրակացի փողոցի շենքերից մեկի բնակարանում ողբերգական դեպք էր տեղի ունեցել։
Ինչպես տեղեկանում ենք Shamshyan.com-ից, երեկոյան ժամը 22.10-ի սահմաններում ահազանգ էր հնչել ՀՀ Ներքին գործերի նախարարության փրկարար ծառայության 9-11 ճգնաժամային կենտրոն առ այն, որ տան բնակիչները ո՛չ հեռախոսազանգերին են պատասխանում, ո՛չ էլ տան թակոցներին արձագանքում։
Կարդացեք նաև
Նշված հասցե ժամանած փրկարարներն ու պարեկները տանը բերանքսիվայր ընկած հայտնաբերել են մոր` 84-ամյա Ալբինա Ղ.-ի և 59-ամյա Նաիրա Հ-ի դիերը։
Տեղի ոստիկանությունից մեզ հաջողվեց պարզել, որ դիերի վրա բռնության հետքեր չեն հայտնաբերվել, խիստ նախնական վարկածով՝ նրանք թունավորվել են գազից. միջանցքում գազի վառարան է տեղադրված եղել։
Դուռը ներսից փակ է եղել, փրկարարներից մեկը կոտրելով բացել ու ներս է մտել։
Մայրը, ըստ տեղեկության, տեսողության հետ կապված խնդիրներ է ունեցել, դուստրը ևս որոշակի առողջական խնդիրներ է ունեցել, նրանք գրեթե ներսուդուրս էլ չեն արել։
Մահացածներից Նաիրա Հ.֊ն նախկինում աշխատել է Շիրակի պետական համալսարանում` որպես օտար լեզվի դասախոս:
Ի դեպ, մայրն ու դուստրը քնած չեն եղել, նրանք հագուստով են, մասնավորապես մոր հագին կան գուլպաներ ու հողաթափեր, նրանք ամենայն հավանականությամբ սեղան են նստած եղել, որի վրա քաղցրավենիք, շոկոլադ է դրված, կան նաև դեղեր,նրանք բերանքսիվայր ընկել են սեղանի շուրջբոլորը։ Տվյալ տեսարանն արտացոլող լուսանկարները չենք հրապարակում՝ ելնելով լրագրողական էթիկայից։
Հարուցվել է քրեական վարույթ` սպանության հատկանիշներով
Նունե ԱՐԵՎՇԱՏՅԱՆ
