Վրաստանը զրո ինդուստրիայից հիմա ՏՏ կամ ԲՏԱ ոլորտը դարձրել է վիթխարի ինդուստրիայի, այն դեպքում երբ մենք ունեինք բավականին լուրջ հաջողություններ այդ ոլորտում։ Այս մասին այսօր ԱԺ-ում ՏՏ ոլորտը կարգավորող նոր օրենսդրական փաթեթի վերաբերյալ խորհրդարանական լսումների ժամանակ ասաց «Սինոփսիս Արմենիա» ընկերության գործադիր տնօրեն Հովիկ Մուսայելյանը։
Վրացիները, ինչպես նշեց Մուսայելյանը, ընդօրինակել են Թուրքիայից, որտեղ ոլորտում զրո տոկոս է շահութահարկը, զրո տոկոս է եկամտահարկը․ «Դա էր պատճառը, որ Մայքրոսոֆթը, Օրակլը եւ վերազգային շատ այլ կազմակերպություններ Թուրքիա գնացին ու մինչեւ այսօր այնտեղ հաջողությամբ գործում են»։
Անդրադառնալով ռուս ռելոկանտների ՀՀ-ից արտահոսքին, Մուսայելյանն ասաց՝ 130 հազար ռելոկանտներից մոտ 90 հազարը ՏՏ ոլորտից էին․ «Այսօր 15-20 հազար են մնացել։ Ինչո՞ւ են գնացել, որովհետեւ մեզ մոտ ընդունված է՝ երբ մի խնդիր է լինում, գները բարձրացնում են, հենց խնդիրը լուծվում է, գները չեն իջնում»։
Օրենսդրական նոր փաթեթով եկամտային հարկի 75% վերադարձի առաջարկը քննարկման մասնակիցներն օրենսդիրին եւ գործադիրին առաջարկում են դիտարկել որպես ոչ թե արտոնություն, այլ՝ ներդրում տնտեսության եւ ոլորտի զարգացման համար։
Կարդացեք նաև
Այս առնչությամբ Մուսայելյանն ասաց՝ Հայաստանի ապագայում ներդրում կարվի այն դեպքում, երբ յուրաքանչյուր տնտեսվարող սուբյեկտ գումար կներդնի իր երկրում կրթության, հետազոտությունների, գիտության բնագավառներում․ «Այս օրենքներն ընդունելիս այդ երաշխիքները պետք է հստակ ունենանք, որ այդ գումարները, որոնք պետք է վերադարձվեն կամ ներդրվեն Հայաստանի ապագայում, պետք է մնան Հայաստանում»։
Մուսայելյանն անդրադարձավ նաեւ հարկային սուգումներին, ասաց՝ ակնհայտ է, որ ՏՏ ոլորտը ամենասպիտակն է միշտ եղել․ «Ամեն տարի այդ հարկային ստուգումները․․․անհասկանալի է․․․ այնպիսի տպավորություն է, որ մեր հարկայինն այնքան ռեսուրս ունի, որ հիմնականում գնում են ստուգումների այն ընկերություններ, որտեղ տարիներ ի վեր մի դրամի տուգանք չի եղել։ Ընկերություններին պարգեւատրում են որպես բարեխիղճ հարկատուներ, ծափահարում են, գլուխ են գովում որ այդպիսի ընկերություններ կան Հայաստանում, ու դրանից հետո հերթական հարկային ստուգումներն են լինում»։
Մանրամասն՝ տեսանյութում
Նելլի ԲԱԲԱՅԱՆ
