ԱԺ նիստում «Հայաստանի Հանրապետության եւ Եվրոպական միության միջեւ Հայաստանում ԵՄ առաքելության կարգավիճակի մասին համաձայնագիրը վավերացնելու մասին» օրենքի նախագծի քննարկման ժամանակ ՔՊ խմբակցության պատգամավոր Արսեն Թորոսյանը հիշեցրեց, որ Ադրբեջանը ՀՀ ինքնիշխան տարածքի վրա հարձակվել է 2021 թվականի մայիսին ու նոյեմբերին, իսկ վերջին խոշոր հարձակումը եղել է 2022 թվականի սեպտեմբերին։
«Եվ միայն դրանից հետո, երբ մենք հասկացանք, որ մեր անվտանգային ճարտարապետության մաս կազմող ոչ մի գործիք չի աշխատում՝ կլինի դա ՀԱՊԿ պայմանագիրը, թե ՌԴ հետ երկկողմ պայմանագրերը, մենք դիմեցինք մեր Եվրամիության գործընկերներին։ Սա շատ կարեւոր է, որ մենք ենք դիմել մեր Եվրամիության գործընկերներին՝ օգնելու մեզ, հնարավորինս անվտանգային նոր գործիքներ մտցնելու մեր ճարտարապետության մեջ, ինչը շատ կարճ ժամանակում ընդունվել է։ Սկզբում տեղակայվել է կարճաժամկետ առաքելությունը, եւ դրանից հետո կրկին շատ կարճ ժամանակում ընդունվել է մշտական գործող դիտորդական առաքելության տեղակայման մասին որոշում»,- ասաց Թորոսյանը։
Նա հավելեց․ «Ըստ էության բոլորս էլ կարող ենք արձանագրել, որ այն հատվածներում, որտեղ նրանք տեղակայված են, մենք ունենք հնարավորինս կայուն վիճակ։ Եվ ունենք որոշ տեղերում ոչ այնքան կայուն իրավիճակ, որտեղ նրանք դեռեւս տեղակայված չեն։ Սա շատ կարեւոր հանգամանք է, այսինքն՝ հակառակ պատկերը չունենք, այդ ամեն ինչը տեղի է ունեցել տեղակայումից առաջ»։
Թորոսյանն ասաց, որ հայկական կողմը ԵՄ դիտորդական առաքելությանը տալիս է այն կարգավիճակը, որը տրվել է բազմաթիվ դեսպանատների, դիվանագիտական այլ ներկայացուցիչների անձնակազմերի։
Կարդացեք նաև
«Մութ սենյակում սեւ կատու չկա։ Ունենք ՍԴ դրական եզրակացությունը, որ համաձայնագիրն ամբողջությամբ համապատասխանում է ՀՀ Սահմանադրությանը»,- ասաց Թորոսյանը։
Ռոզա ՀՈՎՀԱՆՆԻՍՅԱՆ
